MLS leh final inkarah Kanan

I Day Football 2026 semfinal-ah MLS FC-in vawiin chawhma dar 11:00 hian Kanan FC an hmachhawn dawn. MPL club pahnih hian I Day Football nomawi an la chawi lo a, final thlen ringawt pawh hi an club chanchina hun duhawm tak a ni thei ang.

Kanan hian inelnaah bul an ṭan ṭha tawk lo a, match hmasa berah MPL kai thar Ramthar Veng FC an hneh lo nghal. Mahse, heta an chak lo hi Zothantluanga (Apuia) hote tana semifinal kawng sialtu a ni ta daih. Ramthar Vengin champion lai Chanmari FC an hmachhawn a, Kananin an veng ṭhenawm Dinthar an hmachhawn ta zawk.

Mission Vengthlang pa Apuia kaihhruai Kanan hian Aizawl West Derby-ah Maimawms an hneh a, semifinal-ah tawp mai an la duh lo ang. Tun ṭum inelnaah Kanan tlangval Freddy Lallawmawma a pawimawh a; Crespo Vanlalhriatpuia, David Lalchhuanawma, Malsawmzela leh Lalthlanawma te nei bawkin final luh beiseina an nei lian ang.

Mahse, an khelh tawhna thlir erawh chuan Lalrozama Fanai enkawl MLS FC hi an buk a rit zawk. Lawngtlai club hian match hmasa berah Aizawl FC an hneh teuh viau a, match hnuhnung pahnihah an khel ṭha zui.

MLS hian A. Lalhruaitluanga goal hnih hmangin Lushai Corner FA 2-0 in an hneh a, quarterfinal-ah Mizoram Police FC 3-1 in an hneh leh bawk. Tlarhmaah Felix Lalruatsanga an neih avangin an goal bawh a na a, midfield-ah Lalhmangaihkima a ṭangkai bawk.