Pogba-a'n Monaco chhuahsan dawn

France international hlui Paul Pogba chuan AS Monaco a chhuahsan dawn a, French club chuan a contract hi tihtawp an tum niin an sawi - he thuziak i chhiar meuh chuan a chhuak tawh hial mai thei.

Khawvela midfielder ṭha ber pawl ni ṭhin, Juventus leh Manchester United tan pawha lo khel tawh Pogba hi February 2024 khan damdawi hman phal loh a lo hman avangin hrem a ni a, amah chuan a thil eiah damdawi hman phal loh hi a awm tih a hriat loh thu a sawi.

Pogba hi kum li atan hrem ni zet mah se, infiamna khawvela court sang ber Court of Arbitration for Sport (CAS) chuan thla 18-ah a tihtawi sak a, March 2025 khan hremna hi a tuar zo.

Season hmasa khan Monaco hi zawm zuiin, kum hnih atan contract a ziak a, mahse, hliamin a tlakbuak avangin a inlan tam tawk lo. Tun season-ah inlan tam tura beisei a ni a, mahse, coach Sebastien Pocognoli chu Filipe Luis-a'n a thlak a, hei hian Pogba dinhmun a nghawng nghal a ni.

Monaco coach thar Filipe Luís hi Chelsea leh Atletico Madrid defender hlui kha a ni a, Brazilian club Flamengo enkawl tawhin, Serie A leh Copa Libertadores-ah a champion pui thei a, Europe-ah Monaco hmangin a theihna tak tak fiah a ni dawn.