Corinthians chungah Depay a lawm lo

Memphis Depay chu a club khelhna Corinthians-in a contract an tihtawp thut avangin a lungawi lo a, dan anga hma lak a tum - Brazilian club hian inremna an neih sa chu an bawhchhia tiin a sawi.

Depay hian kum 2024 khan Corinthians hi a zawm a, kum hnih atan contract a ziak. A hnuah a contract hi pawhsei leh a ni a, mahse, he contract hi an bawhchhe ta niin Depay chuan a sawi.

Netherlands international chuan, "Club President, sporting, legal leh financial department te nen inrem veka contract ziak kan ni a, mahse, mi ṭhenkhatin chu kan inremna chu an bawhchhe ta a ni.

"Tun ang hun thlen loh hram hi ka duh a, he club hi ka zah em em reng bawk. Mahse, tunah chuan loh theih lohin hma ka lak a ngai dawn a ni," a ti a, mipui hriatah chiang zawka la puanzar leh a tum thu a sawi tel.

Kum 32 mi Depay hian Corinthians tan inelna hrang hrangah match 79 khelin goal 20 a khung a, assist vawi 15 a nei tel. Kum 2025 khan Copa do Brasil-ah champion nomawi chawipuiin, kuminah Supercopa da Brasil an la bawk.

Depay hian Corinthians-ah hian kum khatah euro maktaduai 11 a hlawh a, bonus nen chuan kum khatah €19mtd a la phâk - European football-a top player-te hlawh ang a la phak tihna a ni a, hei bakah hian chenna hotel, car leh security an pek neuh neuh a la tel cheu.

Corinthians chuan Depay-a contract an tihtawp chhan chu sum lama harsatna an tawh vang a nih thu an sawi a, Serie A club chuan, "Thutlukna siam harsa tak a ni tih kan hria a, mahse, Corinthians hma hun atan a ṭul si a ni," an ti.

Brazilian club hlun chuan, an president Osmar Stabile chuan thu chiang zawk sawia media a la hmachhawn tur thu an sawi.