Nottingham Forest neituin Palace a khing

Nottingham Forest neitu Evangelos Marinakis chuan an elpui Crystal Palace chu season hmasaa an banner tar avangin a khing a, a ukil te chuan High Court-ah he thil hi thlenin hma an la chhunzawm dawn.

Nikum August-a Forest leh Palace an 1-1 a an inhnehtawk ṭumin Palace ṭantute chuan Marinakis-a'n Forest midfielder Morgan Gibbs-White luah silaia a tin lai chuanna banner an lek chhuak a, Marinakis hi invauna, match fixing, ruihhlo tawlh leh eirukna lamah a inhnamhnawih lo tih ziakin an tihel.

He buaina hi Tottenham Hotspurs-in pound maktaduai 60-a England international Gibbs-White lak luh an tum hnu lawka thleng a ni a, mahse Forest-ah hian contract thar a ziak zui ta zawk. Gibbs-White hian thutlukna chungchang hi Marinakis nen inkawmna an neihah a sawi bawk. Crystal Palace ṭantute hian Marinakis leh Gibbs-White an tihelna a nih a rinawm.

Kum 59 mi Marinakis-a Forest hian Palace-te aiawtin Europa League-ah hmun an lo chang tawh a, hei hi South London club Palace ten UEFA multi-club ownership dan an bawhchhiat avanga Conference League-a an tlak tak hnua a thil thleng a ni.

Kum 26 mi Gibbs-White chuan, "Forest ka zawm tirh aṭangin in angin ka ngai nghal a, fan-te, teammate leh mi zawng zawngin min support danah ka lawm takzet. Forest hi sang tak thlenpui ka duh a, ka phur tawh hle," a ti.

Forest neitu Marinakis pawhin, "Club tam takin Gibbs-White hi lak an duh a, mahse kan bulah a awm chhunzawm zel dawn. Hmasawn zawngin kan kal zel dawn a, a hma aiin kan ṭha dawn tih hi he club ṭantute ka tiam ngam. Chumi tur chuan kawmng dik kan zawh mek," a ti ve bawk.

Hemi hnu lawk hian Palace fan-te chu an che ve nghal a, an inkhelh ṭumin Marinakis leh Gibbs-White tana hmuh nuam lo tur banner an keng chhuak. November 2025 khan Football Association (FA) chuan an fan-te an thunun tawk loah ngaiin Eagles hi £50,000 a lo chawitir tawh a, mahse an hrem chhan hi banner thlalak vang a ni loin politics thil a inzeh tel vang a ni thung.

FA chuan hremna tichhuak tawh mah se Marinakis-a'n a la duhtawk lo a, hremna an pek chu nep a tiin a hming an tihchhiatna siamṭhatna tham a nih loh avangin a London High Court hnenah a khing. Court chuan nakkum March 8-ah ni 10 chhung trial a neihtir dawn.

Kum kal ta khan club pahnih inkarah hian buaina a lo awm tawh a, kum 2025 khan Palace hi FA Cup-ah champion-in Europa League khel turin an tling a, mahse khel ve tur zinga mi Lyon nen neitu inang an nih avangin UEFA chuan tel an phalsak lo.

An aiah final-a an hneh Manchester City chu tel tur an ni a, mahse Champions League khel tura an tlin avangin semifinal-a an pet thlak Forest hi teltir an ni a, Eagles erawhin Conference League an khel thung. Hei hi banner hmanga Forest an beih chhan pakhat a ni bawk.

Season liam ta khan Conference League-ah hian an champion zui a, Europa League an khel tawh dawn. Mahse champion puitu Oliver Glaser-a'n chhuahsanin Forest a zawm a, Premier League-a an inhmachhawn hunah boruak a tihnun phah ang.

Kumin nipui transfer-ah Forest hian Ousmane Diomande leh Xaver Schlager te an la lut tawh a, season hma khan EPL-ah an inhamtang thei hram a, kuminah Glasner-a hoin hmasawn an tum tawh ang.