I-Day Hmeichhia: Final-ah Tlangvaltea WFC leh GAC

MFA Independence Day Women's Football Tournament 2026 chu nimin khan semifinal khelh a ni a, Tlangvaltea Women's FC chuan 3-2 a Pachhunga University College te hnehin final an lut. Inkhel hnuhnung zawkah Government Aizawl College chuan MFA Starlight te chu 8-2 in an hneh ve bawk a, nuamsa takin an chak.

PUC an vanduai

Inkhel hmasa zawkah Tlangvaltea Women's FC tan Lalrintluangi chuan minute thumna lekah an hmahruaina goal a khung a, Rebek Malsawmkimi chuan minute 20 hnuah an hmahruaina a belhchhah ve bawk.

Goal hnih an chhuah hnuah Mizo hmeichhe player lar Grace Lalrampari chuan an si phurh a sut a, PUC tan beiseina a siamsak. Mahse, injury time-ah Deborah Lalenpuii chuan Tlangvaltea WFC chakna goal a khung a, PUC tan sutna hun a awm tawh loh avangin final an lut.

PUC hi Group A-ah pakhatna ni chungin semifinal an lut a, mahse final luh inchuhna match-ah Grace-i, Lalduhthlani leh Cindy Remruatpuii kawltu team hi a tlawm zawkah an ṭang. Group stage-a goal sarih khung thei Duhthlani leh goal hnih khungtu Cindy te vanneih ni a ni lo a, goal hmangin Grace-i an thlawp thei lo.

GAC an ṭha

Semifinal inkhel hnuhnung zawkah GAC an chungnung tluan zak a, Lalrinmuani chuan goal li a khung a, Lalrohlui'n goal hnih khungin Zonuntluangi leh Zairemmawii ten goal khat ve ve an khung bawk. Starlight tan Lalruatzeli'n goal hnih khung mah se scoreline timawitu chauh a ni.

GAC hian final kalkawngah hneh loh an tawng lo a, match thum an khelh tawhah chak vekin goal 13 teh meuh an khung. Final-a an hmachhawn tur Tlangvaltea Women's FC hi 3-2 a an lo hneh tawh avangin champion an beiseina a sang khawp ang.

Final hi August 15, Inrinni hian Rajiv Gandhi Stadium, Mualpuiah khelh a ni dawn a, group match-a inhmachhawn tawh Tlangvaltea Women's FC leh GAC ten champion nomawi an inchuh dawn.