Ndiaye-a'n Al Hilal a hnar

Everton winger Iliman Ndiaye chuan Al Hilal aṭanga sawmna a hmuh chu a hnawl a, Premier League khelh chhunzawm zel a duh zawk avangin Hill Dickinson Stadium-ah a châm dawn niin Fabrizio Romano-a'n a tarlang.

Kum 26 mi Ndiaye hi sum ṭhahnem tak nen Al Hilal-in Saudi Pro League-a seng luh an tum a, ani hma hian West Ham United aṭangin Crysencio Summerville an lo lak tawh avangin Senegalese forward hi an lak theih an inbeisei hman hle.

Mahse Toffees tana thu lawmawm ni turin Ndiaye-a'n sum tamna Saudi a hnar. Chutihrualin Ndiaye hi Arsenal nen sawizawm a ni bawk a, Gunners-in Real Madrid winger Vinicius Junior an lak theih luh hnuah lak luh an tum zingah a tel a, EPL la khel dawn mah se Everton tan a khel kher ang em tih a sawi theih loh.

Ndiaye hian 2024 nipui bazarah khan Olympique Marseille aṭangin Everton hi a zawm a, hetihlaia amah la luttu hi Sean Dyche a ni. Season hmasaa khan Toffees tan match 34 inlanin goal ruk a khung a, assist pathum a nei bawk.

African Cup of Nations (AFCON)-ah an ram final luhpuiin a champion pui hial a, mahse an nomawi hi Morocco hnenah hlan a ni leh thung. World Cup-ah pawh ram tan a che chhe lo a, club hrang hrang chil tiputtu a ni thei a ni.