Didika'n a thiam a la theihnghilh lo
East Bengal captain hlui Lalrindika Ralte-in a thiam a la theihnghilh lo a, I League kartawp inkhelah Real Kashmir tan goal a khung.
Didika hian minute 84-naah Real Kashmir tana a match hmasa ber chu goal nen a chhinchhiah a, Lunglei tlangval goal khung hma hian Aser Dipanda Dicka chuan Srinagar club tan hian goal-a khung bawk.
Real Kashmir hian 2-0 in Chennai City FC an hneh a, Snow Leopards (Real Kashmir sawina) hian league match hnih an khelh tawh aṭangin point li an nei ta - an match hmasa berah Trau chu 1-1 in an inhnehtawkpui.
Didika hian ISL season ṭan dawn khan East Bengal-ah contract a la nei a, mahse, squad-ah telh a ni lo. Kolkata club hian an hnena contract la nei Didika hi an chhuah duh lawk lo a, January transfer window-ah Mizo midfielder hi an mamawh tur thu an hrilh.
Mahse, footballer tha za Didika'n inkhel loa January nghah a theih loh avangin All India Football Federation (AIFF) lamah a zualko a, AIFF chuan East Bengal hi Didika chhuah turin thu a pe - Kolkata club hian a contract-a awm sa angin Didika hi a hlawh an pe vek bawk.
December 24-ah inkhelh châk Didika'n nupui fanau leh Krismas pawh thlahlel thei loin Kolkata a pan zui a, Covid-19 vangin quarantine (khunghran) nghal a ni - Didika hian hetichhung zawng hian mimalin training a nei a, January 8 hnuah club training a zawm ve chauh.
Didika'n a ṭhiante a zawm tlai avangin Trau lakah pawh squad-ah awm mah se, luhtir a ni lo a, Chennai lakah pawh bench-ah dah a ni - minute 67-naah Didika luhtir a ni a, Dicka nen mawi zeta an in one-two hnuin goal a khung - Real Kashmir tan hian Lalhmangaihsanga Ralte chuan inkhel bul a ṭan bawk.
Lunglei tlangval Didika chuan, "Rei tak ka inkhelh theih loh hnuah goal ka khung leh tak avangin ka lawm takzet a, hei hian phurna nasa tak min pe dawn a ni," tiin Vanglaini a hrilh.
Kartawp inkhel dangah Manipur derby khelh niin Neroca leh Trau-te chu 1-1 in an inhnehtawk - Neroca tan Varun Thokchom chuan minute 10-na lekah goal hmahruai khung mah se
Nigerian striker Joseph Olaleye chuan minute nga hnuah Trau tan si phurh a sut a ni.
Vawiinah I League inkhel a awm dawn lo a, January 19 leh 20-ah match a awm dawn thung. Aizawl FC chuan Nilaini chawhnu dar 2:00-ah Gokulam an hmachhawn ang.