Sheffield-ah Phillips a kir

Sheffield United chuan Manchester City midfielder Kalvin Phillips chu an la lut leh a, English midfielder hian season khat chhung loan-in Blades tan a khel leh dawn. Phillips hian Etihad Stadium-ah June 2028 thleng contract a la nei a, Blades hian a ngheta lak theihna an nei tel lo.

Kum 30 mi Phillips hian kumin kum tir khan loan thoin Blades hi a lo zawm tawh a, mahse a khup hliam avangin a khel tam thei lo a, match thum chiah khelhsak hmanin City-ah a kir.

Kum 2022 khan Phillips hian Leeds United aṭangin Citizens hi pound maktaduai 45-in a zawm a, mahse Spanish midfielder Rodri a nekchhuah zawh loh avangin match 32 chiah a la inlan.

A khelh tam tawk loh avangin England tan pawh kh a ni tawh lo. A career siam ṭhat tumin West Ham United leh Ipswich Town-ah te pawh a lo kal tawh a, mahse ngai a awh leh tawh lo.

England international chuan, "He club tana khelh leh hi ka duh dan tak a ni. Ka awm hmasak zawk khan ka inhliam avangin ka inkhel tam thei lo a, pawi ka ti hle. Player leh staff te an la danglam lo, theihtawp chhuaha thawkho turin ka inpeih tawh hle," tiin a sawi.

Sheffield coach Chris Wilder pawhin, "Nipui chhung zawng khan Phillips nen hian kan inbe reng a, kan bula lo tel leh turin kan duh hle. Tunah chuan kan duh dan ang thlapin thil a thleng a, he transfer hlawhtlin theihna tura min thlawp tlattu Stephen Bettis (Sheffield CEO) hnenah ka lawm takzet," a ti.

Kum 2023-24 season khan Blades hi an relegate a, hemi hnu hian Premier League an khel leh tawh lo. Tun season-ah Wilder-a hoin thapui thawhin EPL khelh leh an tum ang.