Mason Mount a inhliam

Manchester United midfielder Mason Mount chu Paris Saint-Germain nen an inhmachhawn ṭuma a ke an petsak avangin a chawl rih a, training a zawm loh bakah a lo kir leh hun tur sawi theih a la ni lo

Kum 27 mi Mount hian pre season match thum an khelh tawhah a khel ṭha, an player thar Andrey Santos thlawpna hnuaiah midfield lai luahlumtu a ni. A khelh ṭhat avangin season tharah rinrawl ni turin beisei pawh a nei sang hman ang.

Gothenburg-a PSG nen friendly match an khelh ṭumin Mount hian a ke a tina a, United midfielder hlui Darren Fletcher-a fapa Tyler Fletcher-a'n minute 20-na lekah a thlak.

Mahse, hemi hnu hian a team training a zawm leh tawh lo nia sawi a awm a, mahse head coach Michael Carrick chuan English midfielder hi a inhliam na lo a, inkhelh zawhah pawh khan a ṭhiante rualin a haw leh thei tih a sawi.

Chelsea midfielder hlui Mount hian Old Trafford a pan hnuah beisei angin a la khel chhuak thei lo a, pre season a hman ṭhat avangin a tan chance a inhawng a, a inhliam lo tura a indim thiam deuh a ngai ang.

Hetihlai hian Argentine defender Lisandro Martinez chuan training a nei leh thei tawh a, World Cup final an khelh zawh hnua training a neih leh hmasak ber a ni. Licha bakah England duo Marcus Rashford leh Kobbie Mainoo te pawhin an lo kir leh tawh bawk.

Red Devils hian nizan dar 12 khan Leeds United nen Republic of Ireland khawpui Dublin-ah friendly match an khel a, an result kan hre hman lo.