LBS Suzuki Avenis 24th Inter Branch YMA Volleyball Tournament 2026 Final: Zanin dar 8:00-ah Hunthar vs Khawbel

LBS Suzuki Avenis 24th Inter Branch YMA Volleyball Tournament 2026 Final chu zanin dar 8:00 hian R. Dengṭhuama Stadium, Mualpuiah Hunthar Veng leh Khawbel ten an khel dawn. Kumin June thla khan Pro Volleyball Final-ah Hunthar Veng leh Khawbel te hi an inkhel tawh a, hei vang hian tun ṭuma inkhel tur pawh hi 'Dream Final' tia chhal ngam a ni.

CYMA Volleyball final en man hi Rs 50 chauh a ni a, YouTube-ah Central YMA leh Mizoram Volleyball Association te channel-ah a thlawnin a en theih. Chutihrualin tunlai boruak a nuam a, zana inkhel tur an nih bawk avangin a hmun ngeia en a nuam dawn.

Dream Final

Volleyball thiam veng leh khua inkhel tur an nih avangin en a châkawm a, Mizoram chhunga volleyball inelna sang berah pawh final-a inhmachhawn an nih avangin inkhel 'level' a sang dawn. Hei bakah hian final kalkawng thlirin team pahnih champion phu khawpin an khel ṭha ve ve.

Khawbel hian final kalkawngah deciding set khelh an mamawh lo a, semfinal-ah champion lai Muanna Veng an hneh. Hei chauh hi a ni lo a, Khawbel hi Aizawl khaw pawn aiawh tur an ni. Kum 2004-a Champhai Vengthlangin Aizawl pawna nomawi an hawn hnua chawi leh thei hmasa ber tur an nih avangin Aizawl khaw pawnin an ṭan ṭhup dawn.

Hunthar hi vawi thum an champion tawh a, Maubawk nen an champion zat a inang. Champion tam ber record siam thei dinhmunah an ding a, inelna hnuhnung pathumah final an luh vek bawk avangin inrintawkna pawh an ngah khawp ang.

Khawbel hun?

Khawbel leh Hunthar inkhel tur hian mit an ti tlai dawn a, hmuhnawmna belhchhah turin mipui an pawimawh. Final-ah R. Dengṭhuama Stadium leng lo mipui an pungkhawm ṭhin a, tun ṭuma pawh hian ṭhahnem tak pungkhawm tura ngaih an ni.

Aizawl khaw pawn team Khawbel hian PVL an khelh avangin final boruakah pawh an talbuai dawn lo a, Hunthar hi champion tura dah a rem lo. Khawbel innghahna Johan Vanneihsanga'n a hlap ṭha ṭhin a, final-ah pawh Johana hi an innghahna a ni dawn.

Chutihrualin team anga an chet ṭhat a ṭul dawn a, bul ṭantu paruk an neih ṭhatna hman ṭangkaia ṭan phat aṭanga chet ṭhat a pawimawh ang. Captain Joseph Zohmangaiha team a ho ṭhat a pawimawh a, chutihrualin setter Isaac Vanmalsawma hi danglamna thlen theitu a ni dawn.

Khawbel hian coach atan CYMA Volleyball hmeichhe inelnaa Electric Veng vawi hnih champion pui tawhtu Lalrova an la bawk. Electric Veng pa Lalrova chuan, "Champion ngei kan tum a, chumi tur chuan inpuahchahna pawh kan nei ṭha," tiin Vanglaini a hrilh.

Hunthar nge nge

Volleyball thiam veng sawi apianga sawi hmaih loh tur Hunthar hian semifinal-ah harsa takin Nursery Veng an hneh a, hei hi final atana inpuachahna ṭha tak a ni thei ang. Kum li liam taa CYMA Volleyball-a an champion ṭum khan khawtlangin ruai an ṭheh a, vawk paruk leh bawng pathum an talh hial.

Champion boruak tem pha chin kha chuan tem nawn leh an duh dawn a, zaninah pawh entu an ṭhahnem an dawn. Semifinal-ah Laldampuia Chhangte a che ṭha a, captain Remsangzuala (Lalmama) leh vice captain Lalruatfela Sailo te attack a na viau bawk.

Hei chauh hi a ni lo a, net bula pa sang ṭha tak Samuel Lalrinpuia (Mapuia) ṭangkaina hmuh hmaih a thiang lo. Mapuia hian final an thlen theih nan vawi tam a block thla tawh a, attacking player-te ang thoin libero Lalhriatzela nen an pawimawh hle.

Lung a leng

Huntharin final boruak an tem ngun a, kuminah erawh hrang hlui player C. Laldawngkima tel loin final an hmachhawn dawn. Kum 2022-a Hunthar champion khan Dawnga hi best setter a ni a, a kut a dam bakah a thluak a ṭhat avangin a pawimawh hle.

Hei chauh hi a ni lo a, kum 2004-ah pawh Dawnga hian Hunthar hi final a thlenpui a, best spiker a ni hial. Hunthar tan chauh ni lo, Mizoram volleyball-a hmun pawimawh changtu Dawnga hi November 27, 2024 khan thawhah vangin a thi a, final boruak sangah Hunthar mipui ngaihtuahna a ti thui khawp ang.