Tennis player 47 khunghrang

Kar hmasa tawp lam khan Australian Open khel tur an zin lut ṭan a, thlawhtheihna ṭha bik hmangin player leh team member 1000 chuangin Melbourne khawpui an lut - an zinga mi 47 chu hrileng vanga khunghran an ni.

Australia sorkar chuan tournament kaihhnawihah hian mi 1,200 hnenah zin luh phalna a pe a, tunkarah hian a ṭhenkhat chuan Melbourne hi an pan leh ang; inelna khelh hmain ni 14 chhung khunghran hmasak vek an ni dawn.

Khung hran vek tur ni mah se hri kai leh a kaihhnawih neite chu dahna hran bik siam leh a ni a, player dangte angin training an nei rih lo ang. Dah hran bik zinga hian vawi hnih champion tawh Victoria Azarenka leh 2017 US Open champion Sloane Stephens te pawh an tel.

Britain nula Heather Watson pawh danhran a ni a, hetih lai hian amah ang bawka Britain player Johanna Konta, Dan Evans leh Cameron Norrie te erawh hri lakah hian an fihlim thung a ni.

Tournament director Craig Tiley chuan, "Player harsatna tawk zawng zawngte kan be pawp vek a, natna nei an awm lem lo. Inelna neih hmain an dinhmun pangngai an luah leh hman ngei kan beisei," a ti a. Hriselna leh himna an ngaih pawimawh thu a sawi bawk.

Season khat chhunga Grand Slam hmasa ber Australian Open hi ruahman lawk ang chuan January thla a khelh zawh tur a ni. Mahse hri leng vangin sawn tlai a ni a, February 8 aṭangin an khel ṭan chauh ang.