Apuia enkawl Kananin final an thleng

I Day Football quarterfinal hmuhnawm bikah Kananin MLS FC hnehin final an lut. Nimin RG Stadium-a inkhelah hian goal sarih ngawt a lut a, hun pangngaiah 2-2 a ni a, extra time khelh zawhah Kananin 4-3 in hnehna an chang.

Kanan tan hun pangngaiah Crespo Vanlalhriatpuia leh Lalthlanawma ten goal an khung a, MLS tan K. Hmangaihkima leh HC Willis Byhna ten an khung ve bawk. Extra time-ah Steven Jorge Laltlanchhuak hmangin MLS-in khung hmasa mah se Kananin Malsawmzela (Valpuia) goal hnih hmangin an lehthal.

Goal li chu

Season liam ta khan MLS-in Kanan hi Aizawlah 2-1 in an hneh a, Lawngtlaiah team pahnih hi 1-1 in an inhnehtawk. Team pahnih hi an incho tawk a, nimin inkhelah pawh goal a lut tam.

Kananin keeper Tetea Tlauin penalty a chawi a, minute sarihna lekah tun inelna hmang ṭha MLS FC midfielder K. Lalhmangaihkima'n cool zetin a khung. Minute riat hnuah Kananin siphurh an sut lehnghal a, Crespo Vanlalhriatpuia'n a tauh lut. Goal hmasa pahnih keeper tihsual ve ve a ni.

First half injury time-ah Lunglei tlangval Lalthlanawma'n Kanan hmahruaina goal a khung. Crespo corner pet chu David Lalchhuanawma'n a tauh hnuah Thlanawma'n hnai tak aṭangin a tauh lut. Second half-ah goal a lut mai lo a, minute nga hun pek belh a ni a, minute nganaah MLS-in siphurh an sut. Hmangaihkima freekick chu Willis Byhna-a'n a khung.

Goal thum dang

Semifinal aṭangin extra time a awm ṭan a, first half-ah MLS-in an khung. Minute 102-naah Willis-a ball pek changtu Steven Jorge Laltlanchhuak-a'n goal-ah a pet a, Kanan keeper Tetea'n a beng chhuak hman lo.

Kanan an beidawng lo a, danglamna thlentu chu Valpuia a ni. Minute 109-naah vei lam aṭanga Vanlaldinpuia shot-cross chuan crossbar a per a, a per chu hnai tak aṭangin Valpuia'n a khung. Kanan an phur zui a, minute 111-naah captain Freddy ball vawrhluh chu Valpuia'n a tauh lut a, chakna goal a ni zui bawk.

Mission Vengthlang pa Zothantluanga (Apuia) tan result duhawm bik a ni a, MPL club a enkawl hmasak berah I Day Football final a thleng. Kananin final hial an thleng a, nomawi chawi ngei an duh ang.