Aizawl FC-in Chanmari FC lakah phuba an la

14th August, 2026

I Day Football-ah Aizawl FC-in final an lut a, semifinal-a an hneh chu an hmelma Chanmari FC an ni. Coach R. Lalruatfela hote hian season liam ta khan semifinal-ah Chanmari FC hi an hneh lo a, MPL12 final-ah an hneh lo bawk. AFC-in Chanmari lakah phuba an la a, MPL a ngaihnawm sawt ang.

Aizawl FC hian champion lai Chanmari FC hi minute 90 chhungin hneh thei lo mah se extra time-ah inkhel an thunun rah sengin Lalramnghaka'n chakna goal a khung. I Day Football-ah Aizawl FC champion hnuhnun ber chu kum 2016 daih tawh kha a ni a, kuminah coach R-a hoin champion ngei an tum dawn.

Goal khat a tawk

Mizo team ṭha pahnih inkhelah team pahnih an fimkhur a, goal chance hmuh tur a awm lo. Chanmari lamin Rohmingthanga hoa ding Aizawl FC tlarhnung an ṭhiat thei lo a, goal chance ṭha bik sawi tur an nei lo.

Aizawl FC pawhin chance ṭha an nei meuh lo a, minute 90 chhungin bench aṭanga lut Laltlanzova'n crossbar a pet per chu an chance neih ṭhat berah a ngaih theih. Hun pangngaiah goal a luh loh avangin extra time khelh a ṭul phah.

Chanmariin Jerry Mawihmingthanga leh Paul Ramfangzauva te kawl mah se Aizawl FC lamin inkhel an thunun zawk a, an goal bawh pawh a na zawk. Mual vei lamah Zozoa a hmuhnawm a, a goal nawr nat rah Aizawl FC-in an seng.

Minute 114-naah Zozoa corner pet chu Chanmari keeper Zothanmawia'n (T. Mawia) a nam chhuak ṭha tawk lo a, Zomuansanga'n crossbar a tauh ber a, hemi per let hi Vanlalramnghaka'n a tauh lut. Chanmariin siphurh sut tumin bei mah se Aizawl FC keeper RS Lallawmzuala tan hna an siam thei lo. Coach R-a hote 1-0 in an chak.

Lawm a kim lo

Aizawl FC-in an hmelma Chanmari FC hneh mah se an goal khung khawl Khawbel tlangval Zomuana'n extra time hun pek belhah red card a hmu. Zomuana hian yellow card a hmu sa tawh a, referee-in luh tura a tih hmain a tlan lut a, yellow card vawi hnihna hmuin red card a hmu.

Chutihrualin Aizawl FC hi Zomuana tel lo pawhin champion rinkai an ni dawn a, final hi August 15, Inrinni zan hian Kanan nen an inkhel dawn. Kanan tan erawh Zomuana tel lo tur hi chanchin lawmawm a ni ang.