David-a'n goal a khung

Vairengte tlangval David Lalhlansanga'n a hming a chher leh ta - AFC Champions League Two preliminary stage-ah goal khungin, assist vawi khat a nei tel bawk a, East Bengal chu Al Arabi lakah 4-1 in hnehna a chanpui.

ISL champion-in Asian football-a club inelna sang ber dawttu Champions League Two khelhna chance an nei a, qualifier-ah East Bengal hian Kuwait club ṭha Al Arabi an lo mikhual - single leg hmangin a tlang tur zawk an zawng.

Salt Lake Stadium-a inkhelah Al Arabi hian penalty hmangin goal an khung hmasa a, minute 76-naah Anayo Iwuala chuan a chhuih lut - goal luh hun ngaihtuahin, Kolkata club tan beisei a bo hle.

Mahse, minute 90-naah Jay Gupta chuan si phurh sutna goal khungin, 1-1 a ni a, extra time an khel zui. Minute 108-naah captain Mohammed Rashid-a'n hmahruaina goal a khung a, a bak chu David-a 'show' a ni.

Bench aṭanga luhtir David hian minute 117-naah duhthala Al Arabi defender leh keeper a bum hnuin, cool zetin goal a khung a, hun pek belhah aman khung thei reng mah se, Rohit Danu tan duhsak takin a siamsak a, Danu hian goal ruakah a khung.

East Bengal-in hnehna an chan avangin AFC Champions League Two an khel dawn a, $300,000 (vbch 2.86) an dawng - Kolkata club tan hian Edmund Lalrindika chuan inkhel bul a ṭan bawk.

Hetihlai hian Nilaini zanah vek AIFF Super Cup champion FC Goa chuan AFC Champions League Two qualifier an khel ve bawk a, 3-0 a Turkmenistan club FK Arkadag ngam loin an tla.