Russell Westbrook a chawl ve ta
NBA point guard lar ber zinga mi Russell Westbrook chuan Nilaini zan khan, social media-ah minute thum leh a chanvea sei video a dah chhuak a, he video-ah hian inkhel a chawlhsan thu a puangin NBA-ah a hmel kan hmu tawh dawn lo.
Kum 37 mi Westbrook hi 2008 khan Oklahoma City Thunder-in an draft, hetihlai hian OKC hi Seattle SuperSonics hming an put lai a ni. Thunder-ah kum 11 zet khelin 2012 khan final a luhpui a, mahse LeBron James-a telna Miami Heat an hneh lo.
Kum 2019 khan Houston Rockets-ah a kal a, James Harden nen khel dun mah se nomawi a chawipui thei lo. Season khat hnuah chhuak leh nghalin Washington Wizards a zawm a, Wizards tan pawh hian season khat chauh a khel hman.
Los Angeles Lakers chuan American point guard hi kum 2021 khan la lutin LeBron James, Anthony Davis, Carmelo Anthony, Dwight Howard, Rajon Rondo leh Isaiah Thomas te nen an khel ho. Player langsar tak tak nen khel mah se championship a lakpui thei chuang lo.
Lakers tan 2023 thleng khelin hemi hnu hian Los Angeles club pakhat zawk Clippers bakah, Denver Nuggets leh Sacramento Kings tan season khat ṭheuh a khel a, Kings hi a club hnuhnung ber niin championship title chawi loin inkhel a chawlhsan.
Westbrook hi NBA champion a nih theih lohnain a ṭhatna a hliah chuang lo a, 2017 season khan Most Valuable Player (MVP)-ah thlan a ni a, hemi kum vek hian scoring champion a nih a, 2015 khan a lo ni tawh bawk. Hei bakah hian 2018, 2019 leh 2021-ah assist leader a ni bawk a, point score bakah a ṭhiante siamsak a thiam tih a lantir.
All Star-ah vawi kua thlan ni bawkin All Star Game MVP vawi hnih a ni bawk. A career pumpuiah match 1301 khel hmani triple doubles vawi 209 zet a siam a, NBA-a triple double siam hnem ber a ni mek.
Championship title la thei lo mah se an ram tan 2012 Olympic-ah khan gold medal a hlawh chhuak a, hemi ṭum hian LeBron, Kobe Bryant, Chris Paul, Kevin Durant te nen an khel ho. NBA chanchinah Westbrook hi assist neih hnem lamah pangana (10,351) a ni a, point 27,176 score-in 14-na a ni phâk bawk.