Champions League khel tur Liverpool

Chelsea leh Tottenham Hotspur ten season thara Champions League khel turin match tam an la mamawh a, Liverpool erawh match 12 khelh tur la nei chungin season tharah Champions League an khel dawn tih a chiang.

 

Manchester United leh Arsenal tan phei chuan tun 'huna' CL hmun tih chian hi mang ram ang chauh a ni a, heng zawng zawngin chiang taka a hrilhfiahtu chu Premier League-a Liverpool ṭhat falna a ni. 

Inrinni zan khan Reds hian an mikhualna ramah Norwich City chu 1-0 in an hneh a, palina aia hniamah season an khar thei tawh lo - champion turin match nga chiah chak an mamawh tawh bawk. 

Liverpool tan Sadio Mane chuan inkhela goal awmchhun a khung a, Norwich-in a chhanletna tur an neih loh avangin table mawngphah an luah chhunzawm zel. 

Carrow Road-a inkhelah Liverpool-in beisei angin an nawr thei lo a, Championship lama tlak hlau Norwich an ṭang thei hle - Reds-in Norwich tlarhnung an ṭhiat hleithei lo a, an tih theih chu penalty box pawn aṭanga vanneihna zawn a ni. 

Norwich tan counter attack hmangin Alex Tettey chuan hun ṭha a nei a, mahse a pet goal thei lo. First half-ah Lukas Rupp chuan Reds offside trap siam chu ṭhiatin ball a tlan luhpui a, a pet mai dawn emaw tih hnuah Teemu Pukki a siamsak - Alisson a che rang a, ball a lo khawih per hman avangin Reds an him. 

Second half-ah Liverpool an hriam a, Canaries goalkeeper Tim Krul-a'n Mohamed Salah leh Naby Keita-te khung ngei tura ngaih a dan chu fak tlak a ni. Mahse, Netherlands keeper hian rei tak erawh a dang thei bik lo. 

Minute 78-naah Jordan Henderson chuan Sadio Mane tan bawr a vawrh lut a, hliam vanga Liverpool league match hnuhnung pahnih khel lotu hian ṭha zeta ball hi lo dawngin goal-ah a khung. Mane 'class' pholanna goal a ni a, ball siamsaktu Hendo hmuh hmaih a harsa.

Liverpool hian anmahni hnaih bertu Manchester City aia match khata khel tam chungin point 25-in hma an hruai fal tawh a, coach Jurgen Klopp meuh pawhin an hmahruai falna hi mak a ti!

German coach chuan, "Kan inkar zauzia hi a mak a, ka hrethiam lo zawk! Pa inchengvawng leh fing tak ka ni hran lo a, heti zata hmahruai lai ka neih hi ka hre lo. A harsa a, a ropui em em bawk. 

"Inkhelh zawh veleh khan room-ah ka va lut a, hemi chungchang hi kan sawi. Mahse, ka ngaih pawimawh ber erawh hnehna kan chang a, point thum dang kan hlawh chhuak hi a ni," tiin a sawi a, pressure lakah a inveng. 

Reds hian match 26 aṭangin point 76 an nei a, Europe top five league-ah match 26 leka heti zat point nei thei hi an awm ngai lo - ni e, Barcelona, Juvenuts, Bayern Munich leh Paris St-Germain te meuh pawhin an ti thei ngai lo. 

Inkhel chhehvel

•    Liverpool hi league match 43 chhung chu a zawnin an tlawm lo tawh a, record ding lai chelhtu Arsenal (49) an hnaih ta hle. 

•    Reds hian point 105 hlawhchhuah theih aṭangin point 102 an hlawh chhuak tawh. 

•    Liverpool hian an league match hnuhnung 36-ah vawi 35 hnehna an chang a, October-a Manchester United nena 1-1 a an inhnehtawk kha point an hlohna awmchhun a ni. 

•    Reds hian league match 17 chu a zawnin hnehna an chang tawh a, Manchester City record (18) neih sa an hnaih ta hle - an league match hnuhnung 11-ah vawi 10 clean sheet an nei thei bawk. 

•    Sadio Mane-a'n goal a khung chiah khan English club tan inelna hrang hranga goal 100-a khungna chiah a ni. Saints tan goal 25 a khung a, Liverpool tan goal 75. 

•    Mane-a goal kha Liverpool tan Premier League-a goal 57-a khungna a ni a, substitute nichunga Reds tana league-a a khung hmasak ber a ni thung. 

•    Jordan Henderson-a'n league-ah assist vawi nga a nei tawh a, 2014-15 (9) leh 2013-14 (7) kha tun season aia assist a ngah ṭum a ni.