Arsenal mualah chak mamawh Newcastle

Nikum December 12 hnu lamah Newcastle United chuan inelna hrang hrangah chak ni hmel an la hmu lo. Magpies hian zanin dar 1:30 hian Premier League khel turin Arsenal khelmual Emirates Stadium an tlawh ang.

Mikel Arteta-a'n an khingpui tur Newcastle manager dinhmun a hriatthiampui thu a sawi a, English manager Steve Bruce chu pa ṭha leh fing tak - zuam sual theih tak tur a nih thu a sawi tel bawk.

Team pahnih hi tun thlatir khan FA Cup-ah an lo inhmachhawn tawh. Gunners hian Emile Smith Rowe leh Pierre-Emerick Aubameyang te goal hmangin hnehna an chang, zaninah pawh rinkai zawk an ni dawn.

Premier League aṭanga tlak hlauhawm zingah Newcastle an awm mek a, hetih lai hian zanina an chak lo leh a nih chuan an manager an ban mai ringtu an tam. Bruce erawhin atan hun hnuhnung a nih a la ring lo thung.

Kum 60 mi Steve Bruce chuan, "FA Cup-ah Arsenal kan hneh lo a, league lamah Liverpool kan ngam lo bawk. Heng bakah hian tun hnai ni 10 chhungin Leicester City kan hneh lo, khang inkhel pathumah khan tih dik loh lian tak kan neih ka hre lo.

"Sheffield United lakah erawh penalty kan chawi a, player pakhat min hnawh chhuahsak bawk. Kan match hnuhnung pali hi kan thlir chuan kan vanduai tih a lang, kan chet fuh lohna aṭang hian kan thawh chhuah vat ka beisei," a ti.

Bruce chuan sawi zawmin, "Premier League a nih tawh chuan beisei loh result a thleng fo ṭhin. Liverpool laka kan khelh ang khan team dang lakah kan khel thei a nih chuan chak ni hmel chu kan hmu mai ang, tun ṭum hi a tawpna tur a la ni lo ang," a tiin a sawi.

Arsenal pawh in season bul an ṭan fuh lo a, tla mai thei zinga chhiar tel an ni hman hial. Tunah erawh an harh chhuak a, a zawna match li a chak hnuah Crystal Palace nen an inhnehtawk - zaninah chak chhunzawm an tum ang.

Gunners manager Arteta chuan, "Team enkawltu nih chuan sawiselna nasa tak pawh tawng thei reng kan ni, tun dinhmunah Bruce pawhin boruak khirh tak a tawng tih ka hria. Kei chuan ka hriatthiampui, pa fing leh ṭha tak a nih avangin a tho chhuak leh ang ka ring.

"A chang chuan danglamna thlen tur hian insiamrem a ngaih chang a awm. Tun hnaia Magpies chak loh dan hi en ila goal an chhuah tlem a, vanduai vanga chak lo an ni fo," tiin Bruce dinhmun a hriatthiampui thu a sawi.

Arsenal player hliam an dam tawh a, tun dinhmunah chuan player langsar zingah khel thei lo tur an awm lo. Palace hmachhawn thei lo Pablo Mari erawh a chawlh a la ngai dawn, Kieran Tierney erawhin training pangngai a nei tawh.