Sawi zui hlawh Fulham leh Malaga

August 12, Nilaini zan khan Premier League club Fulham leh Malaga te chuan Costa del Sol Trophy inchuhin friendly match-ah 2-2 in an inhnehtawk. Sawi zui hlawh ber erawh Fulham-in penalty shootout an pet duh lo a, Cottagers-in ground an chhuahsan hnuah Malaga-in tihel taka goal ruakah an pet lui bawk.

Estadio La Rosaleda-a inkhelah Cottagers tan Ryan Sessegnon leh Alex Iwobi ten goal an khung a, mualneitu team tan David Larrubi leh Eneko Jauregi te chuan an siphurh an sut.

Malaga goal hnihna hi penalty aṭanga lut a ni a, Fulham defender Calvin Bassey-a'n a kuta ball a khawih a, Jauregi chuan he penalty hi goal-ah a chantir zui bawk.

Penalty an chawi danah Cottagers coach Alvaro Arbeloa-a'n a lawm lohna a lantir nasat avangin hnawhchhuah a ni

Hemi hnu lawk hian inkhel a tawp zui avangin Fulham player te chuan dressing room lam an pan nghal a, Malaga player te erawhin penalty shootout neih an duh avangin ground-ah an ding reng. Inkhel entuten shootout an beisei laiin Jauregi chuan ball chu penalty spot-ah dahin goal ruakah a pet lut a, mahse inkhel hi 2-2 a tawptir a ni thung.

Fulham chuan thuchhuah siamin, "Kan inkhelh hma aṭang tawhin kan inhnehtawk a nih chuan penalty shootout awm lo turin team pahnihten inremna kan nei a ni," tiin X-ah (twitter) an tarlang.

Malaga erawhin, "Penalty shootout awm tura ruahman a ni a, mahse contract-ah shootout hi a lo tel lo tiin Fulham hian pitch an chhuahsan ta a ni," tiin an tarlang ve thung.

Naktuk zan dar 8:30-ah Arbeloa hote hian Craven Cottage-ah Stuttgart an hmachhawn dawn a, an tan pre season match hnuhnung ber a ni tawh dawn. August 24, Thawhṭanni zanah Chelsea nen Premier League-a an match hmasa ber an khel ang.