Amatea run 39 a tawk lo

Board of Control for Cricket in India (BCCI) hnuaia inelna Syed Mushtaq Ali Trophy (2020-21) khelh laiah Mizoram tan Lalhmangaiha (Amatea) chuan run 39 a siam a, mahse hnehna chan nan a tawk zo lo.

Nimin khan SSN College Ground, Chennai-ah Mizoram hi Nagaland nen an inhmachhawn a, run 77-in Nagaland an chak. Mizoram hian group match vawi li an khelh tawhah chak ni hmel an la hmu lo a ni.

Ṭhum vawra chak zawk Nagaland lamin vuak hmasak an thlang a, over 20 chhunga run 178 siamin wicket ruk an hloh. Luangmual tlangval G. Lalbiakvela chuan Mizoram tan hian wicket hnih a la.

Mizoram bat hun a thleng a, an tan run 178 chu umphak harsa, 101/10 bak an tlin lo. Dawrpui tlangval Amatea'n ball 41 a hmachhawn aṭangin run 41 a vaw chhuak a, tun tournament khelh laia Mizo player zingah match khata run siam hnem ber a la ni.

Plate group-ah Mizoram hi - Sikkim, Meghalaya, Chandigarh, Nagaland, Manipur, Arunachal Pradesh leh Bihar te nen an awm khawm. Group khata awmte hi an inkhelh kual hnuah a sang pahnihin knock out round an lut dawn.

Chak la nei lo Mizoram tan knock out stage beiseina a awm tawh lo. Season hmasa pawh khan hneh nei loin in T20 inelna hi an lo hmang zo tawh. January 19, Thawhlehni hian an match hnuhnung ber atan Bihar an hmachhawn leh ang.