Mizo hnam tan lo harhfim zel ang che - CYMA Vice President

Volleyball khel thiam, nula leh tlangval hrisel ṭha ṭhahnem tak awm mah se ruihhlo tihbuai ṭhalai ṭhahem tak an awm. Hemi chungchang hi final zanah CYMA vice president Prof Lalnuntluanga chuan a sawi chhuak a, Mizo ṭhalaite harhfim turin a chah.

Prof Lalnuntluanga chuan, "Kan en turte hi harhfima inkhel turte a ni. Harhfim chuan ngaihtuahna dik leh ngaihtuahna ṭha an nei ṭhin a, infiamna chuan a thunun tlat avangin thil sual tih aiin kawng dik leh ṭha an hria a, chak duhna leh midangte el duhna rilru an nei ṭhin," tiin Mizo ṭhalai zingah ruihhlo laka fihlim an awm thu a sawi.

CYMA vice president chuan sawi chhunzawmin, "Kan ṭhalai tam tak erawh ruihhloin a tihbuai avangin ram leh hnam tan ngaihtuahna pawh seng thei lo. Anmahni tan pawha ngaihtuahna seng thei lo. Chhungkaw tan pawha ngaihtuahna seng thei lo, ṭhalai tam tak kan nei mek a ni. I ramin i hnamin a kohna che chhang turin ruihhlo lakah fihlim la. He ram, he hnam himna atan lo harh fim zel ang che, tiin kan insawm a ni," tiin a sawi.

Mizo ṭhalai a bik takin Mizo mipa zingah ruihhlo a hluar a, Central YMA hmalakna thlawp hi Mizo mipuite tan a pawimawh hle. Central YMA hian infiamna hrang hrangah branch inelna an buatsaih ṭhin a, hei hi infiamna hmasawnna ni ringawt loin ruihhlo dona kawng pakhatna a ni.