English football season a inṭan leh dawn ta

World Cup lunglen pawh thlah a hun ta e - club football lamah rilru pek a hun leh ta chiah a, Pathianni zan dar 7:30-ah English football season bul ṭanna, Community Shield chu khelh a ni dawn.

Premier League champion Arsenal chuan FA Cup champion Manchester City chu Millennium Stadium, Cardiff-ah an hmachhawn dawn a, club pahnihin nomawi nena season bul ṭan tumin an khel ang.

Football khawvela league ngaihven hlawh bera chhal ngam Premier League chu karleh lamah khelh ṭan a ni leh tawh dawn a, match hmasa berah, August 21, Zirtawpni zan hian Gunners chuan Coventry City an mikhual dawn.

EPL ṭan tak tak hmain Community Shield boruak kan tem leh phawt dawn a, FA Cup-ah club tenau ni lo a City an champion avangin club ṭha pahnih an intawng dawn a, hei tak hian Community Shield pawh a tinghahhlelhawm.

Rin hlawh Arsenal

Season hmasa thleng kha chuan, Arsenal leh City inkhel turah Manchester khaw club-in rin an hlawh zawk ṭhin a, tun ṭumah erawh City aiin Arsenal-in rin an hlawh zawk.

A chhan langsar tak pakhatah chuan Gunners hi Premier League champion an nih tak vang a ni a, Mikel Arteta-a'n rei tak an champion tawh loh hnuah nomawi a chawipui - nipui transfer-ah insum hauh loin an in lak belh zel bawk.

Hetihlai hian City erawh an ropuina chhan langsar tak Pep Guardiola-a'n a chhuahsan a, coach thar Enzo Maresca hoin inelna an hmachhawn dawn. Maresca hi hmabak nei êng tak ni mah se, Pep-a te nen huang khata dah chi an ni lo a, Arteta pawh a tan chuan a la u hret.

Heng zawng zawng ngaihtuah hian Arsenal-in rin an hlawh zawk hi a awm viau a, hetihrual hian Maresca hian nomawi a chawi thei ve riau - season hmasaah pawh khan a bul ṭan nan FIFA Club World Cup chu Blues tan a lo la tawh.

Gunners an ṭha

Arsenal-in season hmasaah EPL nomawi an chawi a ni mai lo a, Champions League final an lut tel bawk. English champion an nih mai bakah Europe-a team ṭha ber pawl an ni leh ta a, hmachhawn an châkawm lo.

Nipui transfer-ah midfield thuam chak turin Newcastle United captain Bruno Guimarães an lak belh a, Club Brugge aṭangin forward Christos Tzolis an neih belh bawk - midfield leh tlarhmaah an ṭha sawt tihna a ni.

Galatasaray forward Victor Osimhen pawh Gunners hian an melh leh mek nia sawi a ni a, inthuamṭhat an tum hle - an player rimten zawm an châk nan Community Shield nomawi nen bul an ṭan a ṭul a, Cardiff khawpuiah hnehna hlado chham an tum dawn.

Hetihrual hian centre back pawimawh William Saliba chu hliam vangin a la inlan theih hmel loh a, Netherlands tana World Cup pawh khel thei lo Jurrien Timber pawh a la inenkawl mek.

Hello Maresca

Manchester City-in Maresca hoin nun bul an ṭan dawn a, Chelsea boss hlui tan Pep-a pheikhawk hnutchhiah han inthawlh nghal ngawt chu a harsa deuh mai thei - chak loa bul ṭan erawh a duh dawn lo.

City hian an player pawimawh Rodri chu hliam vangin an la chhawr thei dawn lo a, Spanish midfielder hi dam ṭha tehreng pawh ni se, City chhuahsan duh a nih avangin a inlan a rinawm kher lo.

Hetihlai hian Tijjani Reijnders chu chhuak thei dinhmunah a ding mek a, Bernardo Silva (Real Madrid), Manuel Akanji (Inter Milan), Nathan Ake (Fenerbahce) leh James Trafford (Leeds United) te chu an chhuahtir tawh bawk a, Maresca hnuaiah indinthar hna an thawk mek.

City hian Enzo Fernandez an ngaihven nia sawi a ni bawk a, mahse, nimin kha Chelsea-in an player lei duhtute tan last date-ah an puang. Maresca chuan, "Vawiinah Enzo kan dawr dawn lo," a ti a, a chiang lo ta hle.

Beiseina chu

Maresca-a'n Leicester City a enkawl laiin EPL a inhlankaipui a, Chelsea-in an la lut zui. Blues hi Europa Conference League leh Club World Cup-ah a champion pui a, league season tluan a enkawl chhunah erawh palina an ni hram.

Blues manager hian City enkawl theihna chance a nei tih a hriat rualin Chelsea meuh pawh a hmu lian zo lo a, a chhuak ta a nih kha. Tunah assistant coach ni chunga a thu a ngaihthlak ṭhin Pep a thlak ta a, beiseina sang tak a nei ang.

City hian Nottingham Forest aṭangin midfielder Elliot Anderson chu £116mtd-in an lei tawh a, English midfielder khel vel hi City fan-ten an hmu châk tawh - Leicester City aṭanga lakluh Jeremy Monga, goalkeeper pahnih Pierce Charles leh Geronimo Rulli te hi chu 'big signing' tia sawi tur a ni lo.

Manchester khaw club hi an pre-season match-ah hun pangngaia tlawm an nei lo a, an match hnuhnung berah Atletico Madrid chu 3-1 in an hneh - inringtawk tak chungin Arsenal an hmachhawn ang.