Vawiinah I Day hmeichhe football final

MFA Independence Day Women's Football Tournament 2026 vawiin tlai dar 3:00-ah a hmawr bawk a ni tawh dawn a, Tlangvaltea Women's FC leh Government Aizawl College ten nomawi an inchuh dawn. Final hi Rajiv Gandhi Stadium, Mualpuiah khelh a ni ang.

Team pahnihte hi group stage-ah an lo inhmachhawn tawh a, inkhel hmuhnawm takah GAC-in 3-2 in hnehna an chang. Mahse team pahnihte intawn hmasak hian semifinal an luh ve ve tawh avangin boruak a sang tawk lo a, final-a an intawng leh tur hi hmuh a châkawm tawh.

Tlangvaltea WFC tan Lalrintluangi'n goal hnih a khung tawh a, player langsar dang an awm lo a, vawi hnih an chak tawhah goal khat chiahin an khingpuite nen an inthlau

Mahse team an inlungrual ṭha a, GAC laka an chak loh ṭumin goal thum chhuah mah se goal hnih an khung a, champion tura rinkai Pachhunga University College chu 3-2 in an hneh bawk avangin dah hniam theih an ni lo.

GAC erawh chak loh nei loin final an lut a, Lalrinmuani'n goal ruk khung tawhin Zairemmawii leh Lalrohlui ten goal thum an khung tawh bakah, Zonuntluangi'n goal hnih a khung tawh a, final an luh nan an thawh hlawk hle

Hei bakah hian an match hnuhnung bera MFA Starlight an hneh ṭumin goal riat zet an thun a, inelna pumpuiah goal 13 khung tawhin PUC (16) chiah an tluk lo a, goal khung kawngah harsatna an tawh loh avangin champion turin inrintawkna an ngah phah ang.