India tan Thakur leh Sundar

Brisbane-ah Australia leh India ten Test match vawi lina an khel a, vawiin hian ni lina khelh chhunzawm a ni dawn. Team pahnih hi series-ah 1-1 a an inhnehtawk mek avangin 'The Gabba' a inkhel hian ngaihven a hlawh hle.

Ṭhumvawra vannei Australia-in bat hmasak thlangin first innings-ah run 369 an vaw chhuak a, Marcus Labuschagne-a'n century (108) a siam. India dinhmun a ṭha lo a, Aussies hi chak turin an dinhmun a ṭha. 

Amaherawhchu Men in Blue bat hun a thleng a, player che ṭha fal tak awm lo mah se an chet ṭhat rual avangin chak tura beiseina a nung chhunzawm a, chutihrualin an khelhna tawhna chin thlir chuan an inhnehtawk a rinawm ber.

First innings-ah hian India tan all rounder pahnih Shardul Thakur leh Washington Sundar te che ṭhain run 67 leh 62 an siam a, Men in Blue-in run 336 siamin 'follow on' an pumpelh bakah Aussies hi run 33 chauhin an pha lo. Tamil Nadu player Sundar hian first innings-ah run 89 pein wicket thum a la a, a che ṭha hle.

Nimin khan Australia-in over ruk an bat hman a, wicket an la hloh lo. David Warner-a'n thi loin run 20 a siam a, Aussie batsman ṭha mi hi tun series-ah a la che ṭha lo. India bowler-ten Warner hi vawiin lama an vawm hlum vat thei lo a nih chuan draw ringawt pawh a harsa thei ang.