Reijnders-a'n Al Qadsiah zawm dawn

Manchester City midfielder Tijjani Reijnders chuan Al Qadsiah-in an sawmna chu a pawm a, thuphunga inrem vek tawhin Dutch midfielder hian Saudi Pro League club hi a zawm dawn niin Fabrizio Romano-a'n a tarlang. He thuziak i chhiar meuh chuan engkim a chiang tawh hial ang.

City-in Kum 28 mi Reijnders hi £52mtd-in Al Qadsiah hnenah hralh an remti a, hei hi AC Milan aṭanga an lakna zat £46.5 mtd aiin a tam zawk.

Reijnders hian season hmasa khan City tan a rinrawl a ni a, Pep Guardiola enkawlna hnuaiah match 47 zet a khel a, goal sarih a khung bawk. Spanish midfielder Rodri thlawpna hnuaiah a khel chhe lo.

Kumin World Cup khelh zawh takah pawh an ram Netherlands tan player pawimawh a ni a, match thum a khelhsak. Mahse round of 32 thleng bak a kaipui thei lo a, Morocco hneh loin an tla.

AZ Alkmaar tan pawha khel tawh Reijnders hian Ningani khan City-ah training a la nei a, mahse Liverpool leh Leicester City manager hlui Brendan Rodgers-a enkawl mek Al-Qadsiah hi a zawm hmel ta hle.

Dutch midfielder a chhuak leh a nih chuan City midfield a ruak sawt dawn a, kumin World Cup golden ball dawngtu Rodri dinhmun a chiang lo a, Spanish club lian Barcelona nen sawi zawm a hlawh hle.

Hetihlai hian Citizens pawhin player thar an melh ve reng a, Moroccan midfielder Ayyoub Bouaddi leh Argentina international, Enzo Fernandez te chu lak luh tumin hma an la mek.

Kum 18 mi Bouaddi phei chu City manager thar Enzo Maresca-a'n, Pathianni zana Arsenal nen Community Shield an khelh hmaa Etihad Stadium-a lak luh a duh thu a sawi tawh.

Bouaddi leh Fernandez te hi an kum a la naupan bakah theihna sang tak an nei tih an lantir tawh avangin an man a tlawm dawn lo a, Maresca-a'n khaw dang a hawi a nih loh chuan sum sen hnem a inhuam a ngai dawn