Ipswich-in Scherhant an duh

Premier League Ipswich Town chuan SC Freiburg forward Derry Scherhant lak tumin hma an la a, Tractor Boys hian pound maktaduai 15 thehchhuah an inhuam niin khawthlang chanchinbute chuan an ziak.

Kum 23 mi Scherhant hian season liam ta khan Freiburg tan inelna hrang hrangah match 49 a khel a, goal sarih khungin Europa League final an thlen theih nan player pawimawh a ni.

German rawlthar hian nikum nipui khan Hertha Berlin aṭangin Freiburg hi a zawm ve chauh a, a chhuak leh nghal dawn a nih chuan Freiburg-in £15mtd ai tlawmin chhuahtir an phal dawn lo.

Tractor Boys-in £15mtd-a an dawr takah chuan Freiburg tan chelh reng a harsa tawh dawn a, mahse an dawrna hi an hnar a nih chuan Ipswich tan pawisa tam zawka an dawr leh hmain an inngaihtuah ṭhat a rinawm.

Ipswich hian tun nipuiah transfer-ah an che na a, player 10 lak luh nan £107 bawr vel hmang tling tawhin Manchester United leh Liverpool te aiin an hmang hnem tawh zawk.

RC Strasbourg aṭangin Julio Enciso an la lut hnai tawh bawk a, Paraguay forward hi an player man to ber Emerson-a £24.4 aiin a to dawn nia sawi a awm avangin, an pawisa hman zat hi a pung leh dawn.