Rooney-a'n football boot a khai ta

Manchester United leh England striker hlui Wayne Rooney chuan Zirtawpni khan football khelh a chawlhsan thu a puang a, kum 35 mi Rooney hian a nghetin Championship club Derby County a enkawl ang. 

Inrinni zan khan Rooney-a'n manager nghet a nih hnua a vawi khat nan Derby County a enkawl a, amaherawhchu an mual Pride Park Stadium-ah Rotherham United 1-0 in an hneh lo. Goal awmchhun hi minute 86-naa Jamie Lindsay khung a ni.

Liverpool-a piang Rooney hi Everton aṭangin a rawn lar chhuak. Kum 17 tlin nan ni nga chauh a mamawh tihin Arsenal lamah goal mawi a khung a, match 30 hneh lo nei loa kal tluang tawh Gunners lakah Toffees a chakpui.

Manchester United-in pound maktaduai 25.6-in Rooney an lalut a, Cristiano Ronaldo te nen inkawpin khawvel tlarhma hlauhawm ber zinga mi an ni chho. Wazza (Rooney kohna) hian United hi Premier League nomawi panga, Champions League, Europa League, Club World Cup leh FA Cup pakhat ṭheuh a chawipui bakah League Cup-ah vawi thum a champion pui bawk.

England leh Man United tana goal khung tam ber record chelhtu Rooney hian kum 2017 khan a club hlui Everton-ah a kir a, season khat a khelh hnuin MLS club DC United a zawm. Kum 2019 khan Derby-in Rooney hi an lalut a, Championship club hian coach hna an pe tel. 

Tun season-ah Derby-in season bul an ṭan ṭhat loh avangin manager Phillip Cocu an ban a, Rooney hi team enkawl lailawk tura ruat mi pali zingah a tel a, midang pathum chu Liam Rosenior, Shay Given leh Justin Walker te an ni.

Rams an chet ṭha chuang lo a, Middlesbrough laka 3-0 an chak loh hnuah Rooney chu mimala mawhphurhna chelh tura ruat a ni. Table mawngphah aṭangin Rooney-a'n bul a ṭan a, match riata vawi thum an chak leh vawi li an inhnehtawk zarah relegation zone chhuahsanin 20-naah an awm.

January 9 khan Rooney kaihhruai Rams-in FA Cup-ah Chorley hneh loin tla mah se hna nghet an pe tho. Amaherawhchu Derby hian an elpui Rotherham United an hneh lo a, hemi hma chiah league match-ah an elpui Sheffield Wednesday an hneh loh bawk avangin table-ah 23-naah an awm leh tawh a ni.

Derby boss Wayne Rooney chuan, "Tun ai hian kan la khel ṭha theiin ka hria. Keini aiin Rotherham United an khel ṭha zawk a, point hmuh kan phu lo," tiin an khelh ṭhat tawk loh thu a sawi.