Veteran Football-ah Leitan an champion

LHM Infra Independence Day Veteran Football Tournament 2026-ah Leitan Veteran FC chuan final-ah 2K Generation 4-1 a sawpin an champion. Leitan Veteran hi coach K. Malsawmkima enkawl a ni a, Mala tan hun chhinchhiahtlak a ni. Mala hian I League-ah Aizawl FC a kaipui a, MPL-ah a champion pui bakah National Games-ah Mizoram gold a lakpui - tualchhung football-a nomawi chawi theih ang chu a chawi kim thawkhat hle.

Inrinni tlai khan RG Stadium-ah final hi khelh a ni a, champion tura rinkai Leitanin bul an ṭha a, minute sarihna lekah Lalduhawma Zote-in a khung nghal a, keeper chetsual vang a ni. Leitan an chungnung a, mah se second half ṭantirhah Sail Football Academy chhuak Vanlalnghaka'n siphurh a sut.

Kum 2000 chho vela football-a vanglai hun hmang 2K lamin beiseina thar nei mah se Leitan lamin Lengpui vanglaia an chhuanvawr Rohmingthanga leh a nau Lalchhuanmawia (Chhuantea) te an nei tlat.

Rohminga te unau thlawptuin Kolasib tihmingṭha ṭhintu C. Vanlalfawna'n minute thum chhhung lekin goal hnih a khung. Fawna'n box pawn aṭangin minute 51-naah goal pawimawh a khung a, minute 54-naah box chhung chiah aṭangin ṭha takin a khung leh bawk.

2K Generation-in goal thum an chhuah hnuah thawhchhuah an harsat a, Leitanin inkhel an thunun chhunzawm. Injury time-ah Lalfakmawia'n a vanglaia a thiam thil a theihnghilh lo a, keeper rawn chhuak hmuin box chhung aṭangin a chip a, goal 'class' tak a ni.

Champion phu ber Leitan hun a inher chhuak ve ta a, 2K Generation 4-1 a hnehin an champion. Veteran hi kum 40 chunglam tan a ni a, kuminah hian kum 1986-a piang chin an khel thei a ni .