Hmeichhiaah Tlangvaltea WFC an thiam ber

MFA Independence Day Women's Football Tournament 2026 final chu Inrinni tlai khan RG Stadium, Mualpuiah khelh a ni a, Tlangvaltea Women's FC chuan Govt. Aizawl College 4-1 a hnehin an champion.

Tlangvaltea WFC tan Rebek Malsawmkimi'n goal hnih a khung a, Sangkhumi leh Deborah Lalenpuii ten goal khat ve ve an thawh ve bawk. GAC tan K.Lalrinmuani goal khung chu scoreline timawitu chauh a ni.

Inkhel ṭan aṭanga minute khat a liam hman chauh tihin GAC-in goal an khung nghal a, Rinmuani chuan freekick aṭanga a ball hmuh chu ṭha taka a lak hnuah a pet nghal a, mawi takin an hmahruaina goal a khung. Goal an chhuah danah Tlangvaltea WFC an inring hman lo a, keeper Zami dem theih an ni lo.

Goal chhuah hmasa mah se Tlangvaltea WFC an zam lo a, Kawnpui club tan Rebek-i chuan minute 21-naah chak taka ball a um luh hnuah tawih zetin an siphurh sutna goal a khung a, a team a tiphur sawt.

Tlangvaltea WFC-in inkhel an thunun chhunzawm a, minute 44-naah Sangkhumi'n an hmahruaina goal a khung a, an hawi kir tawh lo. Minute 67-naah GAC defender te tihsual nangchingin, Rebek-i'n keeper chauh a hmachhawn hnuah a goal hnihna a khung. Minute nga hnu lawkah Deborah-i'n mawi taka chip-in an chak nemnghehna goal a khung.

Group stage lamah team pahnihte hi an inhmachhawn tawh a, GAC-in 3-2 in hnehna an chang. Tlangvaltea WFC-in an intawn tawh dan hre reng chunga khelin chak loh nawn an tum tawh lo a, an thil tumah an hlawhtling.

Best player-ah Tlangvaltea WFC player Lalfakmawii thlan a ni a, goal sarih khungtu PUC forward Lalduhthlani Pachuau chu top scorer a ni bawk. GAC forward Rinmuani'n goal sarih tho khung ve mah se, Duhthlani aia a khelh hnem zawk avangin lawmman a dawng ta lo.