Mizoram chhunga I Day Football lawmmanah nuai 14.58 hmang

Mizoram Football Association hnuaiah district 11 a awm a, kumin Independence Day puala MFA leh hnuaia DFA kaihhruai hnuai inelna chhinchhiah chinah inelna 46 a awm a, team 424 zet an tel a, match 622 khelh a ni. Heng inelna lawmman atana sum semchhuah hi nuai 14.58 a ni.

Football khawmpui

Aizawlah MFA-in mipa football (MPL club) bakah hmeichhia leh veteran ten an khel a, Aizawl DFA hnuai zone-ah I Day Football inelna a awm nual bawk.

Lunglei DFA hnuaiah Lunglei, Bunghmun, Tlabung leh Rangte-ah te inelna an buatsaih. Siaha lamah inelna paruk an buatsaih a, Siaha, Tipa, Zyhno leh Chakhei-ah open inelna buatsaihin Siata-ah U16 leh U14 inelna buatsaiha ni.

Champhai DFA hnuai inelna a lian ṭhin a, Mizo coach ṭha bakah player ṭha inlan an tam ṭhin hle. Champhaia inelna lian tak bakah Farkawn-ah open leh veteran inelna buatsaih a ni bawk.

Kolasib DFA hnuaiah Kolasib-ah open leh veteran buatsaih a ni a, Bairabi-ah open leh hmeichhe inelna buatsaih niin Bilkhawthlir leh Vairengte-ah open inelna neih a ni.

Serchhip-ah club tan inelna buatsaih a ni a, First Division leh Second Division inelna siam a ni. Lawngtlai DFA hnuaiah Lawngtlai, Bungtlang, Bualpui leh Vaṭhuampuiah open inelna buatsaih a ni a, Sangau-ah veng leh khua inelna bakah Under 16 mipa inelna buatsaih a ni a, Chawngte-ah First Division leh Second Division bakah hmeichhe inelna buatsaih a ni bawk.

Mamit-ah First Division club tana inelna leh veteran inelna buatsaih a ni a, Hnahthial DFA hnuaiah Hnahthial, South Vanlaiphai leh Cherhlun-ah open inelna buatsaih a ni a; South Vanlaiphai leh Cherhlun-ah hian U14 leh U12 inelna an buatsaih tel bawk.

Khawzawlah open inelna leh veteran bakah hmeichhe football (U17) buatsaih a ni a, Saitual-ah inter village football buatsaih a ni bawk. I Day Football pualin match 622 zet a awm a, football khawmpui lian hming put a phu hle.

A ropui e

I Day Football pual inelna hi Rangte aṭangin Cherhlun-ah, Saitual aṭangin Sangau-ah, Farkawn aṭangin Chawngte-ah, Mamit aṭangin Zyhno-ah khelh a ni a, Mizoram kil tinah inelna hi neih a ni ber. Stadium bakah inelna hi neih a ni ringawt lo a, Mizoram hrang hranga neih a ni a, ngaihhlut pawh an hlawh hlawm hle.

Hmeichhe inelna a awm a, kum bithliah inelna a awm a, veteran football thlengin a awm. Player 8000 chuang an inkhel a, team tel zat ringawt pawh 424 a ni a, a pui tham hle.

Ropui tehna hi sum a ni ringawt lo a, mipuiin inelna an ngaihhlut aṭang pawhin a teh theih bawk. Tun ṭum inelnaah pawh hmun ṭhenkhatah chuan jersey nalh tak an ha kher lo ang, mah se hmun tinah champion thar an awm a, 'hero' thar an piang bawk.

MFA chhinchhiah chinah champion team 46 zet an awm a, Mizoramah chuan football hi India ram zalenna Independence Day lawmna lian ber pakhat a ni.