UFC record thar siamtu Islam Makhachev

Russian fighter Islam Makhachev chuan nimin zing khan UFC 330-ah Ian Machado Garry hnehin a welterweight title a humhim a, Makhachev hi unanimous decision-a chak zawkin, a zawna vawi 17 a chakna chiah niin record thar a siam.

Makhachev hma hian Anderson Silva chu UFC a chak zawn rei ber a ni a, a zawnin fight 16-ah hnehna a chang. Makhachev a chak chiah khan Silva record, kum 13 chhung lo ding tawh chu a khum a, khawvela 'pound for pound' fighter ṭha ber a nihna a nemnghet leh ta.

Round nga an inbeih hnuah Makhachev chuan, "Machado kha fighter ṭha tak a ni a, keipawhin ka zah hle. Min nawr nasa ve hle a, mahse kawng engkimah ka ṭhat zawkna ka lantir zel thei," a ti.

Lightweight world champion hlui Makhachev hian a vawi 29 hnehna leh tlawm vawi khat chiah a la nei a, a khingpui kum 28 mi Garry erawh hi chu vawi 19 a khelh tawhnaah vawi hnih a tlawmna a ni thung. Conor McGregor hnu lama Irish champion hmasa ber nih a tumna chu a tihlawhtling thei ta lo.

Fighter pahnihte inbeih hma aṭang tawhin fight hi 'grappler vs striker' inbeihna hmuhnawm tak tur anga sawi lawk a ni a, a tawpah Makhachev-a'n inman a thiamna hmang ṭangkaiin a dingchang ta zawk.