United-in Amorim-a Milan ngam lo

Manchester United chuan pre season-a an friendly match hnuhnung berah an pu hlui, Ruben Amorim-a enkawl AC Milan chu 4-2 in an hneh lo a, friendly match ni mah se August 22, Inrinni tlaia Premier League khel ṭan tawh tur tan lawmna tur a ni lo.

Red Devils tan Harry Maguire leh Patrick Dorgu ten goal khat ve ve a khung mah se, Milan tan Samuel Chukwueze, Alphadjo Cisse, Goncalo Ramos leh Ruben Loftus-Cheek ten goal khat ṭheuh an khung avangin an chak zo lo.

Tarczyński Arena, Poland-a inkhelah United hian vawi hnih ngawt hmahruai mah se, Milan-in an sut theih zel bakah goal hniha inthlau chungin a tawp an khar thei a, keeper Lorenzo Torriani chu goal khungtute tluk zetin an chak nan a thawh hlawk.

Inkhelh banah United manager Michael Carrick chuan, "Kan khel ṭha tawk lo a, chhuanlam siam kan tum lo. Kan chak loh avangin kan hnual takzet," a ti. Season thar atana an inbuatsaihnaah United hi vawi hnih an chak lohna a ni a, Italian club hma hian Wrexham chu 1-0 in an ngam lo tawh

Chak lo mah se United tan chanchin lawmawm hriat tur a awm tho a; Marcus Rashford, Kobbie Mainoo leh Lisandro Martinez te chu World Cup an khelh hnua a vawi khat nan club tan an inlan.

Kum 28 mi Rashford chu second half-ah lutin December 2024 hnua United tana a khelh lehna hmasa ber a ni a, hetihlaia Man United coach chu an hneh zawh loh Milan coach Amorim a ni. Thla 20 hnuah United tan a inlan leh meuh chuan a teammate hlui Carrick a enkawlna hnuaiah a khel tawh thung.