Lakers-in Kessler an la lut

Los Angeles Lakers chuan Utah Jazz aṭangin Walker Kessler an la lut a, kum li châm tura contract ziakin dollar maktaduai 130 a hlawh dawn a, kum tin $32.5 mtd bawr vel a hlawh dawn.

Kum 25 mi Kessler hi 2022 khan Memphis Grizzlies chuan draft-ah an thlang a, mahse kar hnih hnu lawkah Minnesota Timberwolves-ah an chhuahtir leh nghal. Wolves tan pawh Kessler hian a khel hman chuang lo a, Rudy Gobert lak luh an duh avangin a manah an kaltir.

American center hian Jazz-ah a theihna tak tak phochhuahna hun a nei a, season li khel tawhin season hman zawh takah khan match tinah point 14.4, rebound 10.8, assist 3.0 leh steal 1.4 nei ziah ang a ni.

Jazz tan rinrawl a ni a, an inkhelh apiangin minute 30 khel tling ziah ang a ni. Kessler hi a career-ah hliam na tak a la tawrh loh bawk avangin Lakers tan a ṭangkai dawn.

Lakers hi LeBron James-a'n a chhuahsan hnuah inthuam ṭhat hna an thawk a, player paruk - Quentin Grimes, Sandro Mamukelashvili, Collin Sexton, Ziaire Williams, Kevon Looney leh Matisse Thybulle te an lo la lut tawh a, feet sarih leh inches hniha sang Kessler hi an player thar pasarihna chiah a ni.

Hetihlai hian player paruk-in Lakers an chhuahsan ve thung a, James bakah Luke Kennard, Deandre Ayton, Rui Hachimura, Marcus Smart leh Jaxson Hayes te chuan tun nipuiah Lakers an an lo chhuahsan tawh bawk.