Arsenal-in Quansah an ngaihven

Premier League champion Arsenal chuan an tlarhnung tihchak nan Bayer Leverkusen defender Jarell Quansah an ngaihven mek a, English defender pawh hian London club pan a hreh lo niin thuthang a tam hle.

Gunners tlarhnung ban rinawm William Saliba chu World Cup-a Spain nen an inhmachhawn ṭumin a hnungzâng na vangin lak chhuah a ni a, French defender hi zai ni dawn lo mah se a chawlh chen tur a hriat loh avangin Mikel Arteta-a'n a hmun ruak hnawh khattu tur a melh nghal.

Leverkusen hian kum 23 mi Quansah hi nikum nipui lai khan Liverpool aṭangin pound maktaduai 30-in an la lut a, German club tan season khat chiah la khel mah se an player pawimawh a ni der tawh a, season liam ta khan inelna hrang hrangah match 44 a khel a ni.

Reds defender hlui hmain Gunners hian Aston Villa defender Ezri Konsa chu an lo rim tawh a, mahse a man chungchangah an inrem theih loh avangin an hawisan a, Liverpool defender hlui lam an hawi chhunzawm.

Arsenal-in Konsa man atana an chhiar £60 mtd an pe thei lo a, Quansah lam an awn. Hetihlai hian Quansah hi Leverkusen-in an leina ai toin hralh an tum dawn a, Gunners an insen hnem tho a ngai ang.