Mount-a'n Chelsea a chakpui

Inrinni zan khan Craven Cottage-ah Chelsea an lenglut a, Frank Lampard-a hoten player 10-a khel Fulham 1-0 in an hneh hram. Tun hnaia chet ṭhat tawk loh avangin English manager Lampard-a dinhmun a derthawng a, Mason Mount-a goal zarah insiamṭhatna hun a neih belh ang.

Blues hian match 18 aṭangin point 29 an hlawh chhuak a, pasarihnaah awm mekin an hnuaia awm Southampton leh West Ham nen an point hmuh zat a inang. Lampard-a hote hian January 19, Thawhlehni zan dar 1:45-ah Saints hnehtu Leicester City an hmachhawn ang.

Frank Lampard-a'n player lak dan leh thlan dan aṭangin player naupang theihna nei sang a ngaina tih a hriat a, season ṭantirh lama a duh thala player a rem pawhin France striker Olivier Giroud leh Germany defender Antonio Rudiger te hmun pawimawh a chantir lo. 

Chutihrualin Giroud erawhin a hun ṭha neih a hmang ṭangkai a, a khel tam tawk lo nachungin inelna hrang hrangah goal kua a khung. Blues-in sum tam tak sengin Timo Werner leh Kai Havertz te an lalut a, German duo hian beisei an pha lo hle.

Lampard-a'n a player lak tharte khelhna hun pe ṭha mah se beisei ang result an hlawhchhuah loh avangin Werner leh Havertz te bench-ah dahin Giroud leh Rudiger te bul ṭantu zingah an tel. English manager hian result ṭha a neih lawk loh chuan a hna a chan thei tih hriain Fulham nen hian tawnhriat nei ṭha player a chhawr niin a lang.

West London derby-ah hian Chelsea-in bul an ṭan ṭha a, Giroud-a'n box pawn aṭangin goal zawnah a pet thei lo. Blues academy chhuak Mason Mount-a'n crossbar a pet per a, Rudiger-a ball tauh ṭha zet keeper Alphonse Areola-a'n ṭha takin a dansak.

Chutihrualin Liverpool leh Tottenham laka point hlawh chhuak thei Fulham pawhin chance ṭha an nei a, Ivan Cavaleiro-a'n hnai tak aṭangin chance ṭha bik a hloh.

First half tawp hma hretin Antonee Robinson-a'n Chelsea defender Cesar Azpilicueta a tlawh a, referee tan red card phawrh mai loh chu tih theih dang a awm lo.

Player 10-a khel Fulham lakah Blues goal nawr a na sawt a, mah se finishing a ṭhat tawk loh avangin keeper Areola a ti buai pha lo. Minute 78-naah erawh Ben Chilwell cross chu keeper Areola-a'n hmun hlauhawm laiah a beng chhuak a, Mason Mount-a'n kawh zetin a volley goal.

Injury time-ah substitute Timo Werner-a'n goal dang khung belhna hun ṭha a nei a, keeper chiah a hmachhawn hnuah goal zawnah a pet thei lo a, 1-0 in inkhel a tawp.

Chelsea manager Frank Lampard chuan, "Thla khat liam ta kha chuan dinhmun sang tak kan luah a, khami hnu khan kan che ṭha lo chhunzawm. Tun ṭumah pawh player 10-a an khel chungin kan harsat hle. Inrintawkna kan hloh te pawh a ni ang a, chutihrualin team tinin chet chhiat lai chu an nei a ni," tiin a sawi.

Lampard chuan sawi chhunzawmin, "Mimal anga chet ṭhat loh lai a awm thei a, chutihrualin theihna ang taka lang chhuak thei tur an awm thei bawk. Chumi thlan chhuah thiam chu ka hna a ni. Duhthusam neih hi a har a, hemi ka sawi avang hian kan khelh danah ka lawm lo tihna a ni lo. Lawmna tur tam tak ka hmu a, mah se ka beisei kan pha lo a ni," tiin hmasawn an mamawh thu a sawi.