Poch tel loin PSG an chak

Coronavirus a kai vangin Mauricio Pochettino-a'n Paris St-Germain a enkawl thei rih lo a, an manager awm loh karah French champion hian Angers hneh turin vanneihna an mamawh tel - Layvin Kurzawa goal hmangin 1-0 in an hneh.

PSG hian Ligue 1 match 20 aṭanga point 42 hmuin hma an hruai lailawk a, pahnihna dinhmun luahtu Lyon aiin match khatin an khel hnem thung. Lyon-in nizan khan Metz an mikhual a, hnehna an chang a nih chuan a chung berah an awm leh ang.

Zirtawpni zan inkhelah AS Monaco chuan Montpellier 3-2 in an luhchhuah. Niko Kovac enkawl Monaco hian goal thum an khung hmasak avangin nuamsa taka chak turin an lang hman, hun tawp dawn lama goal hnih an chhuah vang erawhin an tawp lamah an hlauthawng.

Beisei anga season bul ṭan lo PSG hian an coach Thomas Tuchel an ban hial tawh a, Argentine manager kaihhruaina hnuaiah indinthar tum mek mah se danglamna hmuh tur a la tam rih lo thung.

Neymar, Angel di Maria leh Kylian Mbappe te inkawp leh thei tawhin tlarhmaah Moise Kean a awm - hliam damkawr Mauro Icardi chu bench lamah dah a ni thung; player ṭha rual hian Angers tlarhnung an su hawng thei mai lo.

French champion hian goal nei turin an nghah rei a ngai, minute 70-naah defender Kurzawa chuan ball kang lai chu laklawh nei miah loin a hlap lut a, hun tawp thlenga goal dang a luh zui loh avangin khualmualah point thum an hlawh chhuak.

Pochettino awm loh karah assistant coach Jesus Perez chuan team a kaihruai. Perez chuan, "Inkhel hautak tak a ni a, kawng hrang hrangin kan inbei nasa hle. Angers khan an tih tur chin ṭha taka an tih zel avangin hmachhawn an awlsam lo hle.

"A vawi khat nan Mauricio tel loin kan khel a ni a, kan tan chuan thil thar a nih avangin zir tur tam tak a awm. Amaherawhchu telephone hmangin kan inbe thei reng a, khelh dan tur leh pawimawh lai chu kan inhrilh tawn reng," a ti.

Trophee des Champions title la hlim PSG hian an manager dinhmun a ṭhat thu an sawi. Ligue 1 nomawi hnuhnung pariat zinga pasarih la thei club hian an match lehpek atan January 23, Inrinni zanah Montpellier an hmachhawn leh ang.