Roma ngam loh Lazio

Zirtawpni zan Serie A inkhelah season hmasa palina Lazio chuan an mikhual AS Roma 3-0 in an hneh a, nomawi beisei zinga mi Roma tan khualmual aṭanga kut benga haw hi a pawi phak ang.

Lazio tan hian Ciro Immobile-a'n goal hmahruai a khung hnuah Luis Alberto chuan goal hnih khung belhin nuamsa takin hnehna an chang a, season thar atan Champions League khelh an beisei chhunzawm.

Lazio leh Roma inkhel hi 'Derby della Capitale' tih a ni a, a vawi khat nan Zirtawpni zanah an khel. Hrileng vangin a hmuna entu an awm lo, ṭum danga an intawn tawhna nen chuan a boruak a danglam hle.

Team pahnih hian khelmual atan Stadio Olimpico an inṭawm a, season hmasa an intawn hnuhnungah 1-1 in an inhnehtawk. Season kal laiah Roma chungnung zawk rih mah se an inthlauhna chu point thum chauh a ni leh tawh.

Lazio lamin a tir aṭanga nawr na nghalin an tum ang ngeiin goal an nei hma, Simone Inzaghi naute hian ball chang tam zuiin a tawp thlengin inkhel an thunun. Roma tan striker Edin Dzeko-a'n minute 85-naah goal zawnah a pet thei ve chauh a ni.

Lazio manager Inzaghi chuan, "Kan tum leh duh ang takin kan khel chhuak. Kan che rangin kan taima em em vek a, khatianga khel chhuak tur khan inbuatsaihna pawh kan nei ngawrh hle. Elpui club laka hnehna chan hi chu a hlu bik.

"Beisei anga ṭhain season bul kan ṭan lo ngei mai, mahse ni hnih leh a chanve dana match khel ziah anga chawhrual theih kan nei a, hrileng vangin player kan chan hnem bawk. Chutiang kara leng kan nih avang chuan kan thlen chin hi a lawmawm," tiin a sawi.

Roma coach Paulo Fonseca chuan, "A tirah tak kha chuan a bul ṭan ṭha zawk kan niin ka hria, mahse Lazio ang team ṭha lakah chawlhlawk hmain goal hnih kan chhuah a nih chuan thawhchhuah leh a harsa tawh ṭhin," a ti.