Rodri manah Barca leh City inrem

Spanish champion Barcelona chu Manchester City nen Rodri manah pound maktaduai 65-in an inrem a, Spanish midfielder hian Spotify Camp Nou-ah kum li daih contract a ziak dawn niin khawthlang media-te chuan an tarlang.

City innghahna

Kum 30 mi Rodri hian 2019 khan Atletico Madrid aṭangin City hi a zawm a, a man hi £62.8mtd niin, a hunlaia City tana player man to ber record a siam hial. Mahse, amah la luttu Pep Guardiola-a'n a tisual lo a, khawvela midfielder ṭha ber zinga mi a ni.

Tun thlengin City tan match 298 a khel tawh a, nomawi chawi theih zawng zawng a chawipui vek tawh. Hei bakah hian Euro 2024-ah an ram champion puiin 'UEFA Euro 2024 Player of the Tournament award' a dawng a, hemi kum vek hian Ballon d'Or a dawng bawk.

Hemi hnu lawk hian Arsenal nen an inkhelh ṭumin a khupah hliam na tak a tuar a, season tluanin a inlan tawh lo. A inhliam hnuah Rodri hian ngai a awh leh tawh loh ringtu an tam, mahse Rodri-a'n amah ringhleltute chu nomawi leh mimal lawmmanin a chhanglet.

Kumin World Cup khelh zawh takah khan an ram captain a ni a, goal khat chiah chhuaha an champion theih nan an team-ah a khaipa ber niin Golden Ball a dawng bawk.

Rodri hian City squad a la zawm lo a, Pathianni zana Arsenal nen Community Shield an khelh pawh khan hmuh tur a awm lo. City manager thar Enzo Maresca chuan, "Rodri hi World Cup leh Ballon d'Or dawng zo chiah a ni a, player ṭha bik a ni. Club tinin amah ang hi kan mamawh vek a, chuvang chuan Rodri kan ngaih leh ngaih loh lam sawi ka tum lo." a ti.

Real pawhin an duh

Atletico Madrid midfielder hlui hian Etihad Stadium-ah a contract-a season tawp ber a hmang ṭan mek a, Barca hma hian an hmelma kumhlun Real Madrid pawhin lakluh tumin an lo hel tawh.

World Cup zawh hnuah Los Blancos nen thawm nei ve reng mah se, Catalan club lo langin an dawrna hmasa pahnih chu City-in an hnawl zet nain, a kum leh an dawrna zat ngaihtuahin man man takin an hralhah a ngaih theih.

Jose Mourinho hnuaia khel tur Real tan an player lak tum tak, an hmelmain an lak khalh hi a thinrim thlak dawn a, Real aia Barca a zawm danah Rodri-a pu hlui Pep chu a inrawlh bawk avangin El Clasico boruak a tihnun phah bawk ang.

Tunge thlak dawn?

Rodi-a'n Etihad Stadiuma chhuahsan dawn takah chuan, a thlakna tur inrinsiakna a awm nghal nuk a, City-in an hel mek kum 18 mi Ayyoub Bouaddi hming a ri ring hle. City chuan Moroccan midfielder hi lak luh tumin an lo rim reng tawh a, khawthlang media-te chuan Bouaddi khelhna Lille leh City an inrem hnai tawh niin an sawi.

World Cup khelh zawh taka Morocco tana che ṭha tak Bouaddi hi game thunun thiam tak a ni a, Nottingham Forest aṭanga City-in an lakluh Elliot Anderson nen inkawp rem ber tura ngaih a ni bawk.

Chutihrualin Bouaddi hi a kum naupan ang aiin game chhungah a puitling tawh a, a khelh mekna Lille tan rinrawl a nih phâk bakah hmabak êng tak a neih avangin a man a tlawm dawn lo a, City hian £85mtd bawr vel an inseng ang.

Bernardo Silva leh Tijjani Reijnders te chu Rodri hma hian an chhuak tawh bawk a, Spanish midfielder thlakna tur bakah an midfield thuam chak chu Maresca-a'n hna lian takah a nei ang.