Villa-in Suzuki an hnaih

Aston Villa chuan Parma goalkeeper Zion Suzuki an la lut hnai a, an number 1 keeper Emi Martinez hma hun a chian loh chhunzawm.

Kum 23 mi Suzuki hi Paris St-Germain zawm tur anga sawi a awm hman a, a man chungchangah pawh inrem vek tawhin, Japanese keeper hian kum nga chhung atan contract a ziak dawn niin an sawi.

Mahse, Suzuki aiawhte hian contract ziah dawnah an sum phut zat an tipung thut a, hei vang hian PSG chu lungawi loin an inhnukdawk niin an sawi - Villa an vanneih phah dawn.

Kum 2024-a Urawa Red Diamonds aṭanga Parma zawmtu Suzuki hi USA-a piang ni mah se, a nu avangin Japan tan a inlan thei a, Japan tana inlan hi a thlang zawk.

World Cup 2026-ah pawh khan Japan tan player pawimawh niin, match li an khelhah khan a inlan vek - tunah Villa a pan dawn a, Emi Martinez hma hun tur sawi thiam a harsa ta hle.

Kut zungṭang hliam vanga chawl mek Martinez hian kum 2020 khan Arsenal chhuahsanin, Villa hi £17mtd-in a zawm a, number 1 keeper ni nghalin, season hmasaah khan Europa League nomawi a chawipui.

Argentina tan pawh number 1 keeper niin, kum 2022 khan World Cup-ah a champion pui a, kuminah final a luhpui bawk. Juventus nen sawi zawm ni mah se, Italian club hian Spurss keeper Vicario an la lut dawn.

Hetiang a nih avang hian Emi hian eng club nge a zawm dawn sawi thiam a harsa a, Villa-ah a cham a nih chuan kum 33 mi keeper hi second choice keeper nih a zir a ngai dawn niin a lang.