Liverpool-in Como an hneh

Premier League club Liverpool chuan an pre-season match hnuhnung berah Como chu 2-0 in an hneh a, centre back Jeremy Jacquet chuan Liverpool tana a match hmasa ber khelin goal a khung nghal.

Kum 21 mi Jacquet hi Reds hian January thla khan la lut turin an tifel tawh a, a man hi pound maktaduai 60 thlenga sang chho thei tur a ni. Jacquet hi a club khelhna Rennes-ah loan-in khel leh phawt mah se, khup hliamin a tlakbuak zui a, a chawl vang vang.

Como a hmachhawnna inkhel hi February thlatira a khupa hliam a neih hnua a inlan leh hmasak ber a ni. Jacquet hoin Liverpool tlarhnung a phui sawt - Como laka clean sheet an neih hma hian Leeds United leh AS Monaco lakah goal sarih ngawt an chhuah!

Liverpool tan Tottenham Hotspur nena sawizawm hlawh reng Cody Gakpo chuan goal khat a khung ve bawk a, Pathianni zana tun season-a an Premier League match hmasa ber khel tur Reds-in lungawi takin pre-season an khar.

Premier League hi August 21, Zirtawpni zan aṭanga khelh ṭan tur niin, match hmasa berah Arsenal-in Coventry an hmachhawn dawn a, Liverpool hian August 23, Pathianni zan dar 9:00-ah Newcastle United an lenchilh thung ang.