James nen kan inbe lo - Cunningham

Detroit Pistons player Cade Cunningham chuan LeBron James chu anmahni zawm tura a biak loh thu a sawi a, LeBron-a duthlanna leh thutlukna a zahsak thu 'Sports Seriously' podcast-ah a sawi bawk.

Season hmasa zawh rual khan Los Angeles Lakers-a James-a contract a tawp a, hmun dang pan a duh avangin Lakers-ah contract thar a ziak duh lo. Kum 41 mi LeBron kal lehna tur an hriat châk avangin a fapa Bronny James thlengin ngaihven a hlawh phah.

Mahse thla hmasa tawp lam khan LeBron-a'n Philadelphia 76ers a zawm a, 2018-a Cleveland Cavaliers aṭanga Lakers a zawm hnuah a vawi khat nan Eastern Conference lamah a insawn.

Kum 22 mi Cunningham chuan, "LeBron hi phone pawhin ka be lo. Eng thu pawh a hnenah sawi ila min ngaihven ka ring chiah lo. A duh dan angin a awm a, a thutlukna ka zahsak avangin engmah lawm lohna ka nei lo.

Kan inbia anga thuthang awm hi khawi aṭanga lo chhuak nge ka hre lo. Hetiang thil thlengah hian ka inbarh lut ngai lo a, ka hna a ni lo bawk. Kan staff ten hetiang thil hi chu an buaipui tur a ni," tiin a sawi.

Veteran player James hi a kum tam ve deuh tawh mah se, a thiam ngaia a la thiam reng avangin duhtu a la ngah a, club hrang hrang aṭanga sawmna a hmuh laiin Pistons nen hian sawizawm pawh an ni pha lo.

Hetihlai hian Pistons hi season hmasa khan regular season-ah Eastern Conference champion an ni a, American forward LeBron James tel lo pawhin an ṭha thawkhat.

Pistons hian tun nipuiah player pariat - John Collins, Isaiah Joe, Kevin Huerter, Taurean Prince, Gary Harris, Javonte Green, Ugonna Onyenso leh Ebuka Okorie te an la lut tawh. Hetihlai hian player pali - Tobias Harris, Isaiah Stewart, Duncan Robinson leh Caris LeVert ten an chhuahsan ve bawk.