Jose Mourinho ringtu Mbappe

Real Madrid forward Kylian Mbappe chuan club-a awm zawng zawngte chu Jose Mourinho-a'n a enkawl dawn avangin an lawm a, tun season-ah 'The Special One' hian nomawi a chawipui a ring.

Santiago Bernabeu-ah Mourinho hi kum 13 hnuah a kir leh a, 2010 aṭanga 2013 thleng khan Los Blancos hi a lo enkawl tawh. Real a enkawl hmasak zawk khan LaLiga, Copa del Rey leh Spanish Super Cup-ah te nomawi a lo lakpui tawh.

Kum 2011-12 a league title an an lak ṭum khan point 100 zet an hmu tling a, La Liga-a hetiang ti thei hmasa ber an ni. An hmelma Barcelona (2012-13) chiah LaLiga-a point za hmu thei dang awmchhun an ni bawk.

French forward Mbappe chuan, "Mourinho ang coach chak dan thiam, chak tura hmalak dam hretu kan nei hi a lawmawm takzet a, player tinte kan thla a muang bawkin ka hria. World Cup lai khan kan inbe ngun hle a, tawnhriat ngah tak a nih avangin mi biang biak dan pawh a thiam hle.

A kaihhruaina hnuaiah nomawi kan chawi leh ngei dawn tih ka chiang a, chu chu kan duhthusam a ni bawk. Chutiang ti tur chuan kan theihna zawng zawng kan hlan dawn a, Madridista (Real ṭantute) zawng zawngte hnenah hlimna kan thlen dawn," a ti.

Madrid-a Portuguese coach a kir leh hnuin transfer-ah a che na nghal a, Yan Diomande, Marc Cucurella, Carlos Espi, Denzel Dumfries, Ibrahima Konate leh Bernardo Silva te a la lut tawhin, euro maktaduai 225 zet a hmang tawh.

Player thar la mah se Mbappe hi tlarhma lama an innghahna tur a nih leh a rinawm a, Paris St-Germain forward hlui hi season hnih liam ta chhung khan LaLiga-a goal thun hnem ber a ni a. 2024-25 ah goal 31 khungin, season hmasa khan goal 25 a khung bawk.

Real hian August 22 Inrinni zanah tun season atana an league match hmasa ber an khel dawn a, khualmualah Espanyol an hmachhawn dawn. Kum 63 mi Mourinho hnuaiah ṭha taka bul ṭan an tum ang.