Barcola tel lohna PSG an tlawm

French champion Paris Saint Germain chuan Pathianni zan khan, Trophee des Champions-ah RC Lens lakah si khat faiin an tlawm a goal awmchhun hi Florian Thauvin-a khung a ni.

PSG tan Bradley Barcola a inlan lo a, substitute bench-ah pawh a hmel hmuh tur a awm lo. French forward hi Liverpool an hel lai a ni a, French club lianah a dinhmun a chiang lo chhunzawm zel.

Stade Bollaert Delelis-a inkhelah Luis Enrique naute chu inkhel thununtu ni mah se, a tawp thlengin goal an khung thei lo a, Lens tan minute 32-naa Thauvin-a goal chu an chak nan a tawk.

Lens-in goal an khung hnu lawkah an defender Kyllian Antonio-a'n hlauhawm ataka Maghnes Akliouche a tihtluk avangin red card a hmu a, PSG-in awlsam taka an lehthal a rinawm.

Mahse goal hmaah an hriam tawk lo a, hun tawp lamah Nuno Mendes-a'n ṭul lo taka Michal Skóras a nghawk hnuah hnawhchhuah a nih ve bawk avangin, an tan thawh chhuah ngaihna a awm tawh lo a, an result pawm thiam bak tih theih an nei lo.

Inkhelh bana sawi hlawh ber erawh Barcola awm lo a ni a, kum 23 mi forward hi Reds-in Mohamed Salah thlak nan euro maktaduai 135 zetin an lei ngam a, PSG-in €150mtd chhiar mah se amah berin chhuah a duh avangin an chelh rei kher a rinawm loh.

Barcola bakah hian Ibrahim Mbaye leh an player lak thar pahnih, Ferran Torres leh Mika Godts te chu an inlan lo bawk. UCL leh Ligue 1 champion PSG hian August 23, Pathianni zan dar 12:15-ah Rennes an mikhual dawn a, Torres leh Godts te an inlan thei tawh ang.