Scotland coach thar Pocognoli a phur

Scotland national team coach thar Sebastien Pocognoli chuan, an ram miten football an tui chilhna chu Scotland enkawl a duhna chhan niin a sawi a, a hna tharah phurna tam tak a pek thu a sawi

Steve Clarke-a'n kum sarih zet a enkawl hnuah kumin World Cup khelh zawh hnu khan Scotland a chhuahsan a, World Cup group stage-ah Haiti an hneh hnuah Morocco leh Brazil lakah an tlawm a, knockout stage an lut zo lo.

Kum 39 mi Pocognoli hi Pathianni khan Steve Clarke-a aiawh turin nemngheh a ni a, Belgium defender hlui hi season hmasa khan Monaco aṭangin a chhuak a, 2024-25 khan Union Saint-Gilloise chu kum 90 chhung a vawikhatna atan league title a lo lakpui tawh bawk.

German coach Berti Vogts hnua ram dang mi, Scotland mipa team enkawl thei pahnihna chiah a ni . Clarke-a sulhnu hnutchhiah chu a ai ṭha zawka chhunzawm theih a beisei bawk

Chanchinbumiten an kawmnaah Pocognoli chuan, "Heta ka awm hi ka lawm hle a ni. Scotland mipuite hi football ngaina tak an ni a, kan tan chona lian tak leh phurawm tak a ni bawk.

Steve Clarke leh a staff te tluk phak a har dawn hle a, mahse theihtawp chhuaha hna ka thawh dawn bakah Tartan Army (Scotland sawina) hi a sang thei ang ber thlenpui ka tum dawn a, chu chu he hna ka pawm chhan pawh a ni," a ti.