Sao Paulo-in Vardy an duh

Brazilian club São Paulo chuan Jamie Vardy duhtu zingah an tel ve a, English striker hi inremna nei turin an inbe tawh niin journalist rintlak Fabrizio Romano chuan a tarlang.

Kum 39 mi Vardy hian 2024-25 season-a Foxes an relegate khan a chhuak a, Serie A club Cremonese a pan. Season liam ta khan Serie A-ah match 29 khelin goal sarih leh assist pahnih a nei a, a kum tam ve deuh tawh mah se a la rintlak hle.

Season hmasa tawp rual khan a contract zo ve nghalin, free agent a ni mek. A vanglai pe ve tawhin tun hma pha tawh lo mah se club tam takin an la iai lo a, a thlawna an lak theih dawn bawk avangin duhtu a ngah.

Premier League aṭanga relegate West Ham United pawhin Leicester City striker hlui hi lakluh an duh a, English football-a tawnhriat ngah Vardy hi Premier League a kaipui leh turin an duh.

Vardy hian Leicester tan Premier League-ah goal 143 zet a khung a, EPL goal khung hnem lamah 14-na ni phâkin, league title leh FA Cup nomawi a chawipui, hei bakah hian Championship-ah goal 38 a khung bawk.

England tana vawi 26 inlan thei Vardy hian Cremonese a zawm khan England pawna a vawi khat khelhna a ni a, a career tawp lam a hman ve tawh bawk avangin Brazil-a kal a hreh lo mai thei.