Ram tan Suarez inlan leh dawn?

Uruguay head coach thar Diego Forlan chuan a teammate hlui, Luis Suárez chu ram tana khel leh turin a ko mai thei tih a sawi a, Suarez-a'n inkhelh a chawlhsan a nih loh chuan an ram tan a inlan leh theihna chance a awm.

Kum 39 mi Suárez hian Uruguay tan match 143 inlanin goal 69 a khung tawh a, ram tana goal khung tam lamah Edinson Cavani (58) leh Forlan (36) te chungah a awm. September 2024 khan ram tan inkhelh a chawlhsan thu a puang tawh.

Mahse kumin June thla khan World Cup boruakin Suarez-a lung a len a, an ramin an mamawha an koh phawt chuan a inpeih thu a sawi. Mahse, an coach Marcelo Bielsa-a'n Barcelona forward hlui hi a ko ta chuang lo.

Inelna ṭan a nih hnuah Uruguay-in beisei an pha lo nghal a, group stage paltlang zo loin an World Cup zinkawng a tawp. An tlak hnuah Bielsa a bang a, a aiah Forlan rawih a ni nghal.

Kum 47 mi Forlan chuan, "Suarez hi ka zah hle a, ka ring bawk. Tawnhriat nei ṭha leh a club khelh meknaah pawh rinrawl a la ni thei a, ko leh pawh ni ila a awm lo hran lo. Nakinah thutlukna kan la siam ang a, mahse kan ko ta lo a nih pawhin Suarez thiamna hi chu tuma sawi chhiat rual a ni lo," tiin a dah sang hle.

Suárez hian nakkum January-ah kum 40 a tling tawh dawn a, a kum a tam tawh avangin tun hma pha tawh lo mah se theihna sang tak a la nei a, MLS khelh mekah match 15 aṭangin goal 10 a khung tawh a, goal khung a la thiam reng tih a lantir.