Pro Fight: Boxer 82-in hming theh lut tawh

Mizoram Labour Link LPS Pro Fight tel turin boxer 82 chuangin lehkha an theh lut tawh a, August thla chhunga form lakchhuah leh theh luh theih a nih avangin tel tur hi an pun leh a rinawm.

August 1, Inrinni aṭangin application form lak chhuah leh theh luhna hun hawn a ni a, August 15, Inrinni tlai thleng khan form 230 lak chhuah a ni tawh a, mi 82-in tel tumin an theh lut tawh bawk.

Pro Fight-ah hian kum 17 aṭanga 40 inkar, Mizoram chhung leh pawn aṭangin a duh apiang tan a tel theih a, tel tura inpe lut zingah Mizo mai ni loin Mizorama hnam dang chengte leh Meghalaya aṭanga hming pe lut an awm tawh a, Lamka, Manipur atangin boxer 10 bawr velin an tel dawn tih an tichiang tawh bawk.

Kum 2024-a che chhe lo tak tak Lalruatmawia (Chhiahtlang), Sebastian VL Rinnunga (Ramthar Veng) leh Biaklawmthanga (Khuangleng) te chuan tel leh tumin form an theh lut tawh a, quarterfinal lut tawh Benjamin Lalrindika bakah Comedian Search hnuhnung bera boruak nei tak Lalremthanga Hmar te chu an inhnek dawn bawk.

September 4, Zirtawpni zing dar 8 aṭangin LPS Arena, Falkland-ah medical test te neiin an inbuk dawn a, hemi hnu hian a tel tur zat dik tak a hriat tawh ang. Inelna hi September 8, Thawhlehniah neih a ni dawn thung

Weight hrang panga–fly, bantam, light, welter leh middle-ah title an inchuh dawn a, champion laiten kawnghren an humhim dawn a nih chuan anmahni weight tel zinga ṭha ber nen title fight-ah an inhmachhawn dawn.

Champion laiin title an humhim dawn lo a nih erawh chuan, anmahni weight-a tel zinga a ṭha pahnihin champion thar nih tumin title an inchuh thung dawn a ni.

Lawmman pawisa fai cheng nuai ruk singnga bakah mimal chawimawina best boxer, promising boxer, best challenger, best referee leh best judge siam a ni a, inhnek zan apiangin fighter of the night thlan thin a ni bawk ang.

Inhnek tur bakah hian endiktu tur referee leh judge 12 koh an ni tawh a, Pro Fight huaihawttute nen inbiakna neiin ṭha taka inpuahchah turin hriattir an ni tawh bawk a, inelna boruak sangah an pawimawh leh dawn.