Nets tan Harden a hrang nghal
James Harden-a'n nimin zing khan Brooklyn Nets tana a match hmasa ber a khel a, player ṭha bik a nih zia lantir nan triple-double a nei nghal. Nets hi Orlando Magic lakah 122-115 in a chakpui a ni.
Nets tan hian season hmasa lama an chhawr theih loh Kevin Durant pawhin innghahna tlak a nih zia a lantir a, Golden State Warriors player hlui hian point 42 ngawt neiin, season kal laia match khata a point neih hnem ber ṭum a tawng.
Houston Rockets chhuahsantu Harden hna thawh sawi nep theih a ni lo. NBA season hnuhnung pathuma top scorer ni thei hian minute 40 a khelh chhungin - 32points, 14 assists leh 12 rebounds la nghalin a club thar tana bul ṭan dan duhthusam a ni ngei ang.
Nets hian January 19, Thawhlehni zing dar 6:00 hian Milwaukee Bucks an hmachhawn zui dawn. Bucks hi season hmasa Eastern Conference champion an ni a, Giannis Antetokounmpo neitu an nih avangin Nets nena an inkhel hi a hmuhnawm dawn.
Nimin zing NBA regular season inkhel dangah - San Antonio Spurs, Detroit Pistons, Memphis Grizzlies leh Portland Trail Blazers te chuan an khingpui ṭheuh an hneh ve bawk.
NBA Results
Brooklyn Nets 122 - 115 Orlando Magic
San Antonio Spurs 103 - 91 Houston Rockets
Detroit Pistons 120 - 100 Miami Heat
Toronto Raptors 116 - 113 Charlotte Hornets
Memphis Grizzlies 106 - 104 Philadelphia 76ers
Portland Trail Blazers 112 - 106 Atlanta Hawks