India cricketer-ten eng zat nge an hlawh?

Board of Control for Cricket in India (BCCI) chuan January 16 khan Team India (Senior Men) contract an tichhuak. An hlawh hi October 2019 aṭanga September 2020 chhung tur a ni a; Grade A+ ah player pathum captain Virat Kohli, Rohit Sharma leh Jasprit Bumrah te chiah an awm a, nuai 700 an hlawh dawn.

Annual contract list-a sawi hlawh zawk erawh Mahendra Singh Dhoni hming a lang tel lo a, 2011 Cricket World Cup-a India champion puitu hmalam hun hi hriatthiam a har ta hle.

India captain hlui Dhoni hi nikum Cricket World Cup semifinal-a New Zealand an hneh loh hnuah ram tan a inlan tawh lo. India head coach Ravi Shastri chuan, "Dhoni hian ODI career hi a tihtawp hnaih a rinawm a, chutihrualin IPL a khelh ṭhat chuan T20 World Cup squad-a thlan theih a la ni ang," tiin tun hnai khan a sawi.

Kum 38 mi Dhoni hian Test match 90, ODI match 350 leh T20 match 98 a khel tawh a, international match a chawlhsan hmain India tana a la inlan ngei erawh beisei a ni.