Vawiinah Durand Cup semifinal khel dawn

Asia khawmualpuia football tournament upa ber, Durand Cup 2026 chu a hmawr bawk a hnai ta a, zanin dar 7:00 hian semifinal khelh ṭan tur niin, semifinal hmasa zawkah Sporting Club Delhi leh East Bengal an inkhel ang.

SC Delhi hian quarterfinal-ah Raengdai chu 5-1 in an sawp a, he inkhelah hian Mizo tlangval Augustine Lalrochana chuan goal khat a khung. East Bengal hian PV Vishnu-a goal hmangin, Indian Army chu quarterfinal-ah 1-0 in an hneh thung.

Mohun Bagan-in Thawhṭanni tlai khan Jamshedpur FC chu 1-1 in an inhnehtawkpui a, penalty-ah 9-8 in an chak - Men of Steel hian ISL an khelh dawn loh avangin club an titawp tawh a, Bagan nena an inkhel hi Jamshedpur match hnuhnung ber a ni nghal.

Jamshedpur hian group stage-a an match hnuhnung berah khan Indian Air Force chu 6-0 in an sawp a, Lawmsangzuala'n hattrick a siam. Mahse, Mizo player hian Bagan nena penalty shooutout-a chak zawk an zawnna inkhelah penalty a chhuih lut lo.

Thawhṭanni zan quarterfinal inkhelah NorthEast United chuan 5-2 ngawtin Shillong Lajong an hneh a, Highlander tan Alaaeddine Ajaraie chuan hattrick siamin, Ethyan González leh Jithin M. S. ten goal khat ve ve an khung bawk.

August 20, Ningani zanah semifinal match hnihna hi khelh tur niin, Mohun Bagan leh NorthEast United an inkhel ang.