Depay-a'n hlawh a tihniam

Manchester United forward hlui Memphis Depay chuan Corinthians-a khel chhunzawm turin a hlawh tihniam a remti. Dutch forward Depay hian Brazilian club tan hian match 79 khelin goal 20 a khung a, kum 2025 khan Copa do Brasil-ah champion puiin kuminah Supercopa do Brasil a champion pui bawk.

Kum 32 mi Depay hian kar liam ta khan Corinthians hi kum 2024-a kum hnih contract pawtsei tura an inremna bawhchhiaah a puh. Mahse, Brazilian club president Osmar Stabile chuan a hlawh nasa taka tihniamin kum 2028 thleng atan contract a pawtsei tih a puang.

Stabile chuan, "Engkim a ṭha e. Chutihrualin khawvel pum huapa lar pha contract tih fel mai erawh a har hle. Hun rei tak a mamawh a, tunah chuan a fel tawh. Mimal tak pawhin kan inhmu a, Corinthians tana ṭha ber turin inremna kan siam a, a bik takin kan sum dnhmun kan ngai pawimawh," tiin a sawi.

ESPN Brasil-in a tarlan danin Depay hian kum hnih atan pound 19.1mtd-in an inrem a, an inremnaah hian Corinthians-in an sum bat £10.6mtd aṭangin Dutch forward hian £2.9mtd chu ngaihhnathiam a remti. An ba la neih £7.6mtd chu January 2027 aṭangin an rul ṭan ang a, ṭum liah an pe tla ang. Corinthians hian a huna ba a pe lo a nih chuan inngaihnathiamna hi sut a ni thung dawn.

Depay hi Netherlands tana goal khung tam ber record kawltu a ni a, mah se World Cup 2026-ah khan match thum a inlan aṭangin goal a khung lo.